15 ođđa rekrutereneari guolástusealáhussii

– Boahtteáiggi mearrabiepmoealáhus dárbbaša nuorra gelbbolaš guolásteddjiid. Danin lean mearridan ahte galget almmuhuvvot gitta 15 ođđa rekrutereneari, mii lea 50 proseantta lassáneapmi ovddit jagiin. Dát nanne vel eanet dan trenda ahte nuorat ohcalit guolástusealáhussii. Dat lea dehálaš ealáhussii mas lea nu stuorra boahtteáiggepotensiála nugo guolástusealáhusas, dadjá guolástusministtar Per Sandberg.

2015:s gitta 2016 lassánii guolásteddjiid lohku Norggas 11 130:s gitta 11 244:i. 40 proseantta dain ođđa guolásteddjiin ledje vuollel 30 jagi.

Dát ortnet gusto guolásteddjiide vuollel 30 jagi geat eaiggáduššet guolástusfatnasa. Vihtta dain vihttanuppelogi oassálastinlobiin leat eaktuduvvon ohcciide geain lea guhkimus duođaštuvvon guolástanáigebadji, josgo fas maŋimuš logi oassálastinlobi juolluduvvojit seamma vuogi mielde go 2016 juolludanlistu lei. – Dát dahkko vai guolásteaddjit guhkes guolástanáigebajiin ja vásáhusvuđot gealbbuin sihkkarastojit oažžut stuorát oasi oassálastinlobiin, mat dál almmuhuvvojit, dadjá Sandberg.

2009 rájes lea departemeanta jahkásaččat álmmuhan ođđa oassálastinlobiid, nu gohčoduvvon rekrutereneriid, ođđa guolásteddjiide geat eaiggáduššet guolástusfatnasiid. Mihttun lea álkidahttit fanaseaiggátvuođa ásaheami ja sihkkarastit rekruterema guolástusealáhussii. 

– Ortnet dahká ahte máŋga nuorra guolásteaddji ožžot nanu vuođu válljet bissut guolástusealáhusas. Dan mun doarjjun, dadjá guolástusministtar.

Guolástusdirektoráhtta almmuha fargga rekrutereneriid.