Buohkat galget oažžut ođđa vejolašvuođaid

Sullii 400 000 rávisolbmuin leat heajos lohkan ja čállingálggat. Ollugat sis rahčet oažžumis dássedis ja bistevaš barggu. Ráđđehus áigu giđđat 2016 ovddidit stuoradiggedieđáhusa dán áššečuolmma birra, ja árvala 35 miljovnna dieđáhusa čuovvoleapmái boahtte jagi stáhtabušeahtas.

-Ráđđehus lea ovddidan stáhtabušeahta bargama, aktivitehta ja nuppástusa várás. Jos galgat nagodit norgga ekonomiija nuppástuhttit dálá dilis, de fertet addit buohkaide vejolašvuođa lihkostuvvat. Mii fertet addit sidjiide geat leat bargoeallima olggobealde  – ja sidjiide geat balahuvvojit massimis barggu – ođđa vejolašvuođaid, cealká máhttoministtar Torbjørn Røe Isaksen. 

Dieđáhus eallinagioahppu birra

Sullii 400 000 rávisolbmuin váilot vuođđudeaddji lohkan- ja čállingálggat. Sis lea stuorit várra go earáin báhcit bargoeallima olggobeallái.  Ráđđehus háliida ovddidit ođđa politihka rávisolbmuid várás geain leat uhcán oahppu, heajos vuođđogálggat ja váilevaš gelbbolašvuohta. Mihttomearri lea ahte buohkat galget oažžut dássedis ja bistevaš barggu. Doaibmabijut almmuhuvvojit dieđáhusas mii ovddiduvvo Stuoradiggái giđđat 2016, muhto ráđđehus lea juo 2016 bušeahtas  várren 35 miljovnna kruvnnu dieđáhusa čuovvoleapmái.   

Oahppu modulaid bokte  

Ráđđehus áigu geahččalit ođđa fága- ja fidnooahpahusortnega, mii guoská rávisolbmuide geat ovdal eai leat čađahan diekkár oahpu. Ođđa ortnet addá vejolašvuođaid čađahit oahpu oanehis modulaid bokte. Juohke oahppomodula árvvoštallojuvvo sierra, muhto lea ge vuosttas lávki dievaslaš fága- ja fidnooahpahusas. Oahppomodulat heivehuvvojit juohkehačča eallindillái, ja oahppit mearridit ieža áiggi ja modulaid maid dárbbašit. Modulaid sáhttá maid čađahit lotnolasat bargguin dahje hárjehallamiin maid NAV lágida. Dasa lea jagi 2016 várrejuvvon 7,5 miljovnna kruvnnu.   

Bargoeallima vuođđogelbbolašvuođa viiddideapmi

Vuođđogelbbolašvuohta bargoeallimis (BKA) lea ortnet man bokte fitnodagat sáhttet ohcat almmolaš doarjaga nannet bargiideaset vuođđogálggaid. Ortnet lea bures lihkostuvvan ja bargoeallimis lea dasa stuora luohttámuš. BKA-ortnega bokte ii leat dán rádjai leamaš vejolašvuohta addit oahpahusfálaldaga buoridit vuođđogálggaid dárogielas, muhto dat galgá dahkkot 2016 rájes. Bargoeallima áššeoasálaččat leat guhká juo sávvan dan. Nuppástus sáhttá earret eará mielddisbuktit ahte olgoriikalaččat geat masset barggu, johtileappot ožžot ođđa barggu. 

RÁĐĐEHUSA STÁHTABUŠEHTTAÁRVALUS 2016
Oahppu gánnáha
Rávisolbmot barggus maŋŋil čađahuvvon oahpahusa, 2014 proseantalogut ahkejoavkkus 25-66 jagi. 

Nuoraidskuvla                     Joatkkaskuvla                      Alitoahppu