Boazodoallolága rievdadus gulaskuddamis

Eanandoallo- ja biebmodepartemeanta lea sádden gulaskuddamii boazodoallolága § 60 rievdadusevttohusa. Rievdadusa ulbmilin lea ahte ekologalaččat guoddevaš boazodoalu vuođđu galgá bisuhuvvot.

– Lea guhká bargojuvvon unnidit boazologu nu ahte lea heivehuvvon guohtunvuđđui ja ahte lea dan dásis mii lea geavahannjuolggadusain mearriduvvon. Lea earenoamáš dehálaš ahte ekologalaččat guoddevaš boazodoalu vuođđu bistá ovddos guvlui, dadjá eanandoallo- ja biebmoministtar Jon Georg Dale. 

– Danin galget čađahuvvot doaimmat mat hehttejit boazologu sávakeahtes ođđa lassáneami. Dan rievdadusas mii dál evttohuvvo boazodoalloláhkii lea eastadeaddji váikkuhus boazologu laskamii, ja dainna lágiin addá vuođu ráfehisvuođa ja riidduid unnideapmái, dadjá Dale.

Fylkkamánni galgá sáhttit mearridit alimus boazologu

Sáddejuvvo gulaskuddamii lasáhusevttohus boazodoallolága 60 §:i nu ahte Fylkkamánni, earenoamáš sivaid geažil, galgá sáhttit mearridit siidaoasi alimus boazologu. Rievdadus galgá hehttet boazoeaiggádiid lasiheames boazologu maŋŋá gorálaš unnideami. 

Earenoamáš sivat 

Addojuvvo maiddái láhkaásahus mas almmuhuvvo mat adnojuvvojit earenoamáš sivvan. Earenoamáš sivvan oaivvilduvvojit dilit gos siidda boazolohku maŋŋá gorálaš geahpideami, čájehuvvo leat lassánan eanet go 5% mearriduvvon alimus boazologu bajábeallái.

Diekkár dilálašvuođas mearriduvvo boazolohku ovttaskas siidaoassái dan dássái mas lei ovdal lassáneami. Eaktuduvvo ahte Fylkkamánni ii sáhte dahkat diekkár mearrádusaid guhkit go viđa jahkái ain háválassii. 

Seammás galgá láhččot dilli nu ahte siskkáldas iešmearrideapmi ain galgá sáhttit doaibmat go rahppojuvvo vejolašvuohta dasa ahte guokte dahje eanet siidaoasit sáhttet ođđasit juogadit boazologu eiseválddiid mearridan rámma siskkobeale.