Buorre bohccobiergobuvttadeapmi
Ođas | Almmustahtton: 10.04.2024 | Maŋimuš ođasmahttojuvvon: 11.04.2024 | Eanadoallo- ja biebmodepartemeanta
Dán dálvvi njuovvanáigodat lea dál loahpahuvvon. Doaibmajagis 2023/2024 njuvvojuvvojedje 66 420 bohcco. Dat lea alimus njuovvanlohku njealji jahkái.
Guohtunroasuid geažil lea bohccobierggu buvttadeapmi rievddadan maŋemus jagiid. 2020:s ja 2022:s ledje boazodoalus goavvejagit ja guohtunroasut. Dál lea fas goavvi, ja ođđajagis lea njuvvojuvvon unnibuš go golmma ovddit dálvvi. Seammás oaidnit mii ahte dán njuovvanáigodagas lea njuovvanhivvodat lassánan.
– Guohtunroasut leat gáibideaddjit boazodollui ja dat čuhcet buvttadeapmái. Boazodoallošiehtadusa bokte lágidit mii vejolašvuođa buoridit boazodoalu rámmaeavttuid, ja boađus das lea buorre biergobuvttadeapmi. Dat lea deaŧalaš boazodoalu ceavzilvuhtii ja árvoháhkamii, lohká eanandoallo- ja biebmoministtar Geir Pollestad.
Buvttadeami ja njuovvama ovddideami dihte lasihedje bealálaččat njuolggodoarjagiid boazodoallošiehtadusas 2024/2025. Buvttadandoarjja ja miessenjuovvandoarjja rehkenastojuvvojit ovddit jagi sisaboađu ja buvttadeami mielde, ja dat lea stuorámus ávkin sidjiide geain lea boazodoallu váldodoaibman.