Historjjálaš arkiiva

Bures bargamin divššohasaid dearvvašvuođabálvalusaiguin

Historjjálaš arkiiva

Almmustahttináigodat Solberga ráđđehus

Almmustahtti: Dearvvašvuođa- ja fuolahusdepartemeanta

Gaskavahku, ođđajagimánu 7.beaivvi almmuhii stáhtaráđđi Bent Høie stivrenulbmiliiddis, politihkalaš áigumušaidis ja vuordámušaidis buohcceviesuid ektui. Dán jagi buohcceviessosártnis deattuhii son ahte ráđđehus lea duođalaččat bargamin divššohasaid dearvvašvuođabálvalusaiguin.

- Jos galgat nákcet hábmet divššohasaid dearvvašvuođabálvalusa, de fertet dustet hástalusaid eará láhkai go ovdal. Mii fertet šaddat čeahpibun, ja geavahit ođđa vugiid, ja  váldit mielde divššohasaid ja mielbargiid eanet go ovdal. Ja dan mii leat juo bures vuoruhišgoahtán, celkkii Høie.

Buohcceviessosártnistis almmuhii Bent Høie movt ráđđehus áigu čuovvolit politihkalaš vuođđodokumeantta dehálaš osiid. Høie čujuhii sártnistis ahte ollu doaibmá bures Norgga buohcceviesuin, muhto hástalusat gávdnojit ain.

- Ollu lea hirbmat buorre, ja Norga lea njunnošis go buohtastahttá eará riikkaiguin. Go divššohasat vuos bohtet buohccevissui, de sii dábálaččat ožžot hirbmat buorre divššu. Muhto mis leat guokte dehálaš hástalusa: Leat ollugat geat šaddet vuordit dárbbašmeahttun guhkes áiggi, ja kvalitehta, beaktilvuohta ja vuordináigi rievddada buohcceviesus buohccevissui ja buohcceviesuid siskkobealde. Daid čuolmmaid ferte duođalaččat čoavdit, celkkii Høie.

- Dan geažil šaddá guovllu dearvvašvuođafitnodagaid bargun ráhkadit strategiijaid movt uhcidit kvalitehta ja vuordináiggi erohusaid buohcceviesuin. Sii galget gávnnahit gokko gahkká, árvalit doaibmabijuid mat jávkadit erohusaid, ja ráhkadit plána movt buohcceviesut sáhttet oahppat guhtet guoimmisteaset, dajai stáhtaráđđi.

Buohcceviessosárdni dollojuvvui ovdal oktasaš čoahkkima maid dat njeallje guovllu dearvvašvuođafitnodaga lágidedje. Doppe ovddidii stáhtaráđđi stivrenulbmiliiddis ja vuordámušaidis buohcceviesuide ja spesialistadearvvašvuođabálvalussii ja geigii departemeantta bargodokumeanttaid guovllu dearvvašvuođafitnodagaide.