Konsešuvdna Stokkfjellet bieggamillofápmorusttegii

Oljo- ja energiijadepartemeanta lea odne nannen konvenšuvnna TrønderEnergi Kraft OS:i Stokkfjellet bieggamillofápmorusttegii Selbus. Seammás nannejuvvo NVE biehttaleapmi E. ON ohcamii konvenšuvnna Kopperaa bieggamillofápmorusttegii Meråker suohkanis.

- Stokkfjellet bieggamillofápmorusttet lea teknihkkalaččat/ruđalaččat hirbmat buorre, ja dan lea bures vejolaš čađahit. Prošeavtta leat dohkkehan eananeaiggádat ja Selbu suohkan, ja sáhttá buktit ealáhusovdáneami báikkálaččat sihke dalle go huksejuvvo ja go boahtá doibmii, dadjá oljo- ja energiijaministtar Terje Søviknes.

Trønder Energi Kraft OS lea ožžon konvenšuvnna NVE:s hukset bieggamillofápmorusttega mas gitta 90 megawatt (MW) fápmu Stokkfjellet báikái Selbu suohkanis. Boazodoallu, áššeorganisašuvnnat ja ovttaskas priváhta olbmot váide NVE mearrádusa. Lulli-Trøndelága fylkkamánni ovddidii vuosteákkaid konvenšuvdnaohcamii.

Departemeanta lea váiddameannudeamis earenoamážit árvvoštallan Riast/Hyllingen boazoorohaga beliid. Dan oktavuođas lea dollojuvvon čoahkkin Fylkkamánniin ja konsultašuvnnat boazoorohagain ja Sámedikkiin gos vuosteákkat lea digaštallojuvvon. Departemeanta diehtá daid heajut beliid maid bieggamillofápmorusttet sáhttá buktit boazodollui, muhto ii oainne ahte bieggamillofápmorusttet šaddá hehttehussan orohaga boahttevaš gánnáhahtti boazodollui. Departemeanta lea dan oktavuođas čavgen konsešuvdnaeavttuid boazodoalu dihte. Departemeanta vuordá maid ahte ráhkaduvvo šiehtadus boazodoaluin vai dat ii vurjojuvvo, earenoamážit huksenáigodagas.

Bieggamillofápmorusttet sáhttá olles doaimmas addit jahkásaččat sullii 250 gigawatt diimmu fámu jahkásaččat (GWh), mii vástida sullii 12.500 viessodoalu rávdnjeanu. Departemeanta lea váiddameannudeamis árvvoštallan ášši eanádaga, olgoastindoaimmaid ja bartaguovlluid ektui. Luonddumáŋggatbealatvuohta lea earenoamážit váldojuvvon vuhtii daid mearriduvvon eavttuin mat leat konsešuvnnas.

Departemeanta lea odne maiddái nannen NVE biehttaleami E. ONs ohcamii konsešuvnna Kopperaa bieggamillofápmorusttegii Meråker suohkanis. Departemeanta lea biehttaleamis deattuhan boazodoalu, eanádaga ja olgoastindoaimmaid beroštumiid. Dasa lassin leat ruoŧa eiseválddiid ákkat prošeavtta vuostá mearkkašan departemeanta meannudeapmái dán oktavuođas.