Kreativt Norge galgá leat Tråantes

- Tråantes lea nanu biras mii lea čadnon NTNU:ii ja ođđa teknologiijai. Go bidjat Kreativt Norge Tråantii, de sihkkarastit ahte iešguđet fágabirrasat veahkkálaga fargga ásahit eallinfámolaš kontuvrra kultuvrralaš ja kreatiivvalaš ealáhusa várás, dadjá kulturministtar Linda Hofstad Helleland. Kulturministtar almmuhii odne ahte Norgga kulturráđi kontuvra Kreativt Norge galgá leat Tråantes.

Adm.dir.  NiT Berit Rian, Kulturráđi dir. Kristin Danielsen, kulturministtar Linda Hofstad Helleland, rektor NTNU Gunnar Bovim ja adm.dir. Innovasjon Norge Anita Krohn Traaseth.
Gurut bealde olgešguvlui: Adm.dir. NiT Berit Rian, Kulturráđi dir. Kristin Danielsen, kulturministtar Linda Hofstad Helleland, rektor NTNU Gunnar Bovim ja adm.dir. Innovasjon Norge Anita Krohn Traaseth. Govva: Martin B. Andersson / Kulturdepartemeanta

Ráđđehus galgá jagis 2017 čađahit historjjálaš áŋgiruššama kultuvrralaš ja kreatiivvalaš ealáhusa ektui. Ulbmil lea veahkehit ovdáneami, árvohuksema ja  bargosajiid dakko ahte lasihit investeremiid dáidda- ja kulturbuvttademiide ja daid gávpejohtui. Eanet gelbbolašvuohta fidnohutkamis, gávpe- ja márkanovdánahttimis lea kultursuorggis lea guovddážis dán barggus.

Áŋgiruššan čuovvu máŋga luotta. Doarjjaapparáhta norggas mii almmuha norgga kultuvrra riikkaidgaskasaččat galgá nannejuvvot. Aktevrrat ja fitnodagat main lea ovdánanvejolašvuohta galget sáhttit hukset gelbbolašvuođa, fierpmádaga ja kapitála. Ja de vel galget ovttaskasdáiddárat oažžut veahki lasihit márkanpotensiála ja beassat geavahit nanu ja gelbbolaš doarjjaapparáhta. Dát doaibma lea addojuvvon Norgga kulturráđđái dakko ahte kontuvra Kreativt Norge lea ásahuvvon Tråantes.

- Mii áigut nannet dáiddáriid vejolašvuođaid lasihit iežaset sisaboađu, ja láhčit dili smávit gávpedoaimmaide ja doarjjaapparáhtii dáiddáriidda, dadjá kulturministtar Linda Hofstad Helleland.

- Go kultureallin ja kreatiivvalaš ealáhusat leat fárus, de sáhttá Kreativt Norge ovdánahttit ođđa gávpemálliid boahtteáigái.

Kulturministaris lea earenoamážiid beroštupmi kultuvrralaš ja kreatiivvalaš ealáhusain ja lea ovdal ásaheami deaivvadan aktevrraiguin mat bohtet miehtá riika.

Stuoragávpotfierpmádat, mas Romsa, Tråante, Bergen, Stavanger, Kristiansand, Drammen ja Oslo leat mielde leat čájehan áigumušaid ja áŋgirvuođa ovdánahttit kultuvrralaš ja kreatiivvalaš ealáhusaid. Dán áŋgiruššama áigu Kreativt Norge atnit ávkin viidáset bargui.

- Juohke áidna gávpot ja guovlu sáhttá fállat sihke resurssaid ja vissis gelbbolašvuođabirrasiid mat fertejit doaibmat ovttasráđiid Kreativt Norg:iin, dadjá kulturministtar.

Kreativt Norge galgá leat našuvnnalaš kontuvra mii bargá aktiivvalaččat nannen dihte kultuvrralaš ja kreatiivvalaš ealáhusaid buot guovlluin. Ulbmil lea ahte Kreativt Norge galgá leat veahkkin nuppástuhttimis, árvohuksemis ja oažžut eanet bargosajiid guovlluin, ja veahkehit ovdánahttit eallinfámolaš kultureallima mii láhčá dili kultuvrralaš ovdáneapmái ja taleanttaide miehta riika.