Lasseoahppu eanet go 5000 oahpaheaddjái

Eai goassige ovdal leat leamaš nu ollu lasseoahppofálaldagat maid oahpaheaddjit besset válljet. Dál gávdnojit 180 iešguđetlágan oahppofálaldaga maid oahpaheaddjit sáhttet ohcat.

Guovvamánu 1.b.  rájes sáhttet oahpaheaddjit ohcat lasseoahpu Oahpahusdirektoráhta neahttasiidduin.

– Ohcanlogut čájehit ahte oahpaheaddjit háliidit lasseoahpu. Diibmá ledje váile 8 500 oahpaheaddji geat ohce, ja ráđđehus joatká lasseoahpu historjjálaš áŋggirdeami, cealká máhttoministtar Torbjørn Røe Isaksen.

Eanet fálaldagat go ovdal

Eanet go 5 000 oahpaheaddji sáhttet oažžut lasseoahpposaji čavčča rájes sadjásaš- ja stipeandaortnega bokte. Fágat nu go matematihkka, eŋgelasgiella, dárogiella, sámegiella vuoruhuvvojit, muhto gávdnojit maid fálaldagat ollu eará fágain.

– Eanaš 180 oahppofálaldaga leat vuoruhuvvon fágaid várás. Muhto dan lassin gávdnojit fálaldagat earret eará pedagogihkas daid oahpaheddjiid várás geat oahpahit mánáid geain lea eará eatnigiella, ja fálaldat luonddufágas ja praktihkalaš ja estehtalaš fágain, dadjá Røe Isaksen.

Badjelaš miljárdda kruvnnu lasseohppui

Stáhta máksá 75 proseantta sadjásašgoluin daid oahpaheddjiid ovddas geat čađahit lasseoahpu matematihkas ja luonddufágas, ja 60 proseantta eará fágain. Stipeandaortnega bokte galget gielddat máksit mátke- ja orrungoluid ja vel oahpponeavvuid.

– Ráđđehus geavaha maiddái 2016:s badjelaš miljárdda kruvnnu oahpaheddjiid lasseoahpuide.  Lea erenoamáš dehálaš ahte gielddat ja fylkkagielddat váldet ovddasvástádusa ja mielas dohkkehit ohcamušaid oahpaheddjiin geat háliidit ovdánit fágalaččat, loahpaha máhttoministtar Torbjørn Røe Isaksen.

Oppalaš dieđut lassioahpu birra:

  • Guovvamánu 1.b.rájes sáhttet oahpaheaddjit ohcat lasseoahpu dáppe: www.udir.no
  • Eanet go 5 000 oahpaheaddji sáhttet oažžut lasseoahppofálaldaga čakčat 2016 sadjásaš- dahje stipeandaortnega bokte
  • Stipeandaortnega bokte sáhttá oažžut gitta 100 000 kruvnnu stipeandda jos čađaha oahpu mii addá 30 oahppočuoggá
  • Ohcanáigemearri skuvlajahkái 2016/2017 lea njukčamánu 1.b. Ovdal njukčamánu 15.b. galgá skuvlaeaiggát dohkkehan dahje hilgun ohcamušaid, ja sáddet daid viidáset meannudeapmái Oahpahusdirektoráhttii
  • Matematihkas ja luonddufágas máksá stáhta 75 proseantta sadjásašgoluin, ja 60 proseantta eará fágain. Eará fágain máksá skuvlaeaiggát 15 proseantta. Loahppa 25 proseantta lea oahpaheddjiid oassi iežaset áiggi geavaheami ovddas  
  • Skuvlaeaiggát galgá máksit mátke- ja orrungoluid, ja oahpponeavvuid