Lien álggahii huksendoaimmaid Báhccavuonas Romssa suohkanis Skáidái Finnmárkkus

Oljo- ja energiijaministtar Tord Lien (OvB) lei son gii duorastaga goivestii johtui Statnett elfápmolinnjá huksendoaimmaid Báhccavuonas Romssa suohkanis gitta Skáidái Finnmárkkus. Davvi-Norggas lea dát okta dain stuorimus investerenprošeavttain, mii gártá máksit gaskal njeallje ja guhtta miljárdda kruvnnu.

Huksendoaimmat álggahuvvojedje Skoddavarremoen báikkis Álttás.

-  Otná beaivi lea stuora beaivi olles Davvi-Norgii. Elfápmolinnjá nanne fápmolágidansihkkarvuođa maiddái riikka davvioasis. Dán riikkaoasis lea dát okta dain stuorimus siskkáldasstruktuvrrašprošeavttain. Dat láhčá dili industriijaovdáneapmái ja eará  ealáhusdoaimmaide dán guovllus, ja ođasmahtti fápmobuvttadeami, cealká oljo- ja energiijaministtar Tord Lien (OvB).  

Ofuohta-Báhccavuona elfápmolinnjá maid dál lea huksemin ja dát ođđa 420 kV-linnjá nanne fápmolágidansihkkarvuođa Davvi-Norggas. Elfápmolinnjá huksejuvvo cehkiid mielde, álggos Báhccavuonas Ráisii Romssa suohkanis. Go 300 kilomehter guhkkosaš elfápmolinnjá lea gárvvis, de dat guoská čieža gildii Romssas ja Finnmárkkus. Prošeakta meroštallojuvvo máksit gaskal njeallje ja guhtta miljárdda kruvnnu.

-  Mii fertet rápmot Statnett dan barggu ovddas maid sii dán rádjai leat dahkan. Prošeakta lea viiddis ja gáibideaddji, ja mu áddejumi mielde leat davvinorgga ealáhuseallin, almmolaš eiseválddit, fágaorganisašuvnnat ja Sámediggi garrasit háliidan ahte dát elfápmolinnjá huksejuvvo. Dat mearkkaša hirbmat ollu Davvi-Norgii ja fápmolágidansihkkarvuhtii miehtá riikka, dadjá oljo- ja energiijaministtar Tord Lien (OvB).  

Duogáš

Oljo- ja energiijadepartemeanta attii lobi hukset ođđa elfápmolinjá cuoŋománus 2015. Departemeanta leai dalle meannudan ollu váiddaáššiid ja čađahan moanat ráđđádallančoahkkimiid. OED vuhtiiválddii luonddušláddjivuođa ja boazodoalu beroštumiid ja mearridii rievdadit jođasspáittu Ivguvuovddi ja Gáivuonvákki gaskka Romssa suohkanis.