Ložžet rávvagiid ollásit boahkuhuvvon olbmuide

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Ráđđehus lea Álbmotinstituhta ávžžuhusaid vuođul mearridan ložžet njuolggadusaid mat gustojit sidjiide geat ollásit leat boahkuhuvvon. Priváhta ruovttuin sáhttet sii geat leat váldán buot boahkuid doalahit lahka sosiála oktavuođaid (vuollel 1 mehtera gaska) earáiguin geat maid leat váldán buot boahkuid. Sii sáhttet maid sosiálalaččat ovttastallat singuin geat eai gula riskajoavkkuide ja eaige leat boahkuhuvvon. Almmolaš báikkiin fertejit buohkat geat leat boahkuhuvvon ja boahkukeahtes olbmot čuovvut seamma rávvagiid ja njuolggadusaid.

-Mii oažžut eanet ja eanet doallevaš dieđuid ahte boahkuheapmi suddje oažžumis váralaš dávdda ja ahte dat eastada njoammuma viidáseappot. Daid dieđuid vuođul geahpedat ráddjehusaid doppe gos dat lea vejolaš, dadjá dearvvašvuođa- ja fuolahusministtar Bent Høie.  

Guokte boahku leat dárbbašlaččat suddjet covid-19 dávdda vuostá. 

Seamma njuolggadusat almmolašvuođas
Jos vel boahkuheapmi várjala covid-19 dávdda vuostá, de sáhttá dávda ain njoammut sidjiide geat ollásit leat boahkuhuvvon. Boahkuhuvvon olmmoš sáhttá maid njoammudahttit dávdda earáide. Ja olmmoš ii álo fuomáš ahte son lea  njoammuduvvon. 

-Almmolašvuođas, eará olbmuid guovdu ii leat álki diehtit geat eai leat boahkuhuvvon riskajoavkkus.   Nu guhká go ollugat eai leat boahkuhuvvon, ja nu guhká go boahkuhuvvon olbmot sáhttet njoammuduvvot ja earáid njoammudahttit, de fertejit buohkat čuovvut seammalágan rávvagiid ja njuolggadusaid almmolašvuođas, dadjá Høie.

Son deattuha dárbbu ráhkadit álkis ja čielga rávvagiid ja njuolggadusaid daidda báikkiide gosa ollu olbmot čoahkkanit.

Koronaduođaštus boahtá
-Dađisgo eanet ja eanet olbmot boahkuhuvvojit, de lea vejolaš ložžet eanet ráddjehusaid ja eará njoammuneastadandoaimmaid servodagas. Seammás árvvoštallat riikkaviidosaš koronaduođaštusa, namuha Høie. 

Koronaduođaštus galgá sisttisdoallat boahkuhanstáhtusa, leamaš go covid-19 dávda ja maŋimuš koronaiskkusdieđuid. Dat sáhttá mielddisbuktit ahte sáhttit ložžet almmolašvuhtii guoskevaš njuolggadusaid jos koronaduođaštus lea ortnegis. Dan eat  sáhte dahkat dušše boahkuhemiin.    

-Mii geahčadat maid mo boahkuhanstáhtus sáhttá váikkuhit errengeatnegasvuhtii, dadjá Høie.  

Rávvagat sidjiide geat ollásit leat boahkuhuvvon:

  • Ruovttus ja biillas sáhttet ollásit boahkuhuvvon olbmot sosiálalaččat gávnnadit (vuollel 1 mehtera gaska) earáiguin geat leat boahkuhuvvon jos vel gullet ge riskajovkui

  • Ollásit boahkuhuvvon olbmot sáhttet sosiálalaččat gávnnadit boahkukeahtes olbmuiguin geat eai gula riskajovkui

  • Ollásit boahkuhuvvon olbmot berrejit ain doalahit doarvái buori gaskka  (unnimusat 1 mehtera) boahkukeahtes olbmuide geat gullet riskajovkui ja eai ge ása seamma viesus

  • Olggobeale ruovttu (almmolašvuođas, maiddái almmolaš johtalusas) gustojit seamma rávvagat ja njuolggadusat go ovdal. Ovdamearkka dihte rávvagat ja njuolggadusat mat gustojit gaskkaide, loguide, buhtisvuhtii, njálbmesuoji geavaheapmái.