Aktiver Javascript i din nettleser for en bedre opplevelse på regjeringen.no

Norga lea doaibmaoasálaš riikkaidgaskasaš eamiálbmotgielaid ávvojagis

ON váldočoahkkin lea mearridan ahte 2019 galgá leat riikkaidgaskasaš eamiálbmotgielaid jahki.

– Ráđđehus doarju ON barggu sierra eamiálbmotgielaid jagiin. Giella lea hirbmat dehálaš oassi olbmuid eallimis, ja giellajahki lea mielde čalmmustahttimin eamiálbmogiid historjjá, kultuvrra ja identitehta. Ráđđehus háliida leat mielde giellajagi čalmmustahttimis ja searvá doaibmaoasálažžan, dadjá gielda- ja ođasmahttinministtar Monica Mæland.

Lea UNESCO mii ovddasvástida giellajagi, ja stivrenjoavku lea válljejuvvon mas stáhtaid ja eamiálbmogiid ovddasteaddjit, ja Bistevaš foruma miellahtut leat mielde.  Sámediggepresideanta Aili Keskitalo lea okta jođihanjoavkku áirasiin.

– Lea illudahtti go sámediggepresideanta lea mielde stivrenjoavkkus. Dainna lágiin lea sus vejolašvuohta loktet ja ovddidit árktalaš eamiálbmotgielaid  riikkaidgaskasaččat, dadjá Mæland. 

Mihttomearri lea ahte eambbogat geavahišgohtet sámegielaid

Ráđđehus lea juolludan 1,1 milj. kruvnnu lassáneami Sámediggái čađahit doaimmaid riikkaidgaskasaš eamiálbmotgielaid oktavuođas. Sámediggi  áigu giellajagi čalmmustahttit iešguđet lágidemiid ja doaimmaid bokte. Ráđđehus lea hui mielas ovttas lágidit muhtin doaimmaid.

– Giellajahki movttiidahttá min buohkaid áŋgiruššat eamiálbmogiid gielaid ovdii. Ráđđehusa mihttomearri lea ahte eambbogat galggašedje geavahit sámegielaid, muhto dat eaktuda ahte sámegielat oidnojit servodagas, dadjá Mæland.

Ráđđehusa čuovvuleapmi NAČ 2018:6 Váibmogiella čielggadusa ektui lea dán barggus hui dehálaš.  

Eanet dieđut: UNESCO neahttasiidu eamiálbmotgielaid birra

 

Gielda- ja ođasmahttindepartemeantta preassatelefovdna: 22 24 25 00

Bajás