Ráđđehus joatká spiehkastannjuolggadusa mii guoská dearvvašvuođabargiide geat leat mannan ealáhahkii

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Koronapandemiija geažil lea mearriduvvon spiehkastannjuolggadus mii addá vejolašvuođa penšunerejuvvon dearvvašvuođabargiide máhccat ruovttoluotta bargui almmá dan ahte penšuvdnasisaboahtu unniduvvo. Ráđđehus evttoha joatkit dán ortnega.

-Koronapandemiija lea erenoamážit čuohcan dearvvašvuođa- ja fuolahusbálvalussii. Danne evttoha ráđđehus dál guhkidit ortnega suoidnemánu 2022 rádjai vai dearvvašvuođabargit, geat leat mannan ealáhahkii besset veahkehit dearvvašvuođa- ja fuolahusbálvalusa almmá dan ahte penšuvdnasisaboahtu unniduvvo. Penšunerejuvvon dearvvašvuođabargiid veahki lea hirbmat mávssolaš ja dehálaš vai nagodat dustet hástalusaid mat mis dál leat, dadjá bargo- ja searvadahttinministtar Hadia Tajik.

Spiehkastannjuolggadus gusto vel dán jagi. Departemeanta áigu   láhkaproposišuvnna bokte evttohit Stuoradiggái guhkidit spiehkastannjuolggadusa suoidnemánu 1.b. 2022 rádjai. Jos Stuoradiggi dohkkeha evttohusa, de guhkiduvvo maid almmolaš AFP ortnet seamma láhkai láhkaásahusrievdadusa bokte. 

-Pandemiija lea ain min gaskkas. Fágaolbmot, maiddái pensionisttat, leat leamaš stuora veahkkin juo guhkit áiggi. Mun lean ilus go mii dál láhččit dili nu ahte sii ain sáhttet veahkehit váttis ja hástaleaddji áiggis, dadjá dearvvašvuođa- ja fuolahusministtar Ingvild Kjerkol.   

Spiehkastannjuolggadus mii guoská penšuvdnasisabohtui lea ráddjejuvvon dušše covid-19-doaimmaide. Muhtumat leat háliidan geavahit spiehkastannjuolggadusa maiddái eará dearvvašvuođa- ja fuolahusbálvalusdoaimmaide go njuolgut covid-19-doaimmaide. Dan ášši ferte ollislaččat árvvoštallat ja dan oktavuođas lea dehálaš deattuhit ahte dat lea koronapandemiija mii dagaha ahte eanet bargit dárbbašuvvojit. Ovdamearkan sáhttá čujuhit ahte gielddat dárbbašit dearvvašvuođabargiid čađahit covid-19 boahkuhemiid ja influeansaboahkohemiid. 

Boahkuhanbargu lea oppalohkái hirbmat mávssolaš doaibmabidju vai dearvvašvuođa- ja fuolahusbálvalus nagoda hálddašit sihke pandemiija mii dál lea jođus ja fállat dábálaš dearvvašvuođa- ja fuolahusbálvalusaid.