Riikii boahtima erren loahpahuvvo

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Álbmotdearvvašvuođainstituhta rávvagiid mielde loahpaha ráđđehus errennjuolggadusaid mat gusket mátkkošteddjiide geat bohtet Norgii, danne go daidda ii leat šat dárbu njoammuneastadanfágalaš árvvoštallama vuođul. Errennjuolggadusat loahpahuvvojit gaskaija, ođđajagimánu 26.beaivvi 2022 čuovganeapmái.

Dál fertejit buohkat geat bohtet Norgii mannat njoammunerremii, jos bohtet daid guovlluin gos erren gáibiduvvo, ja jos eai sáhte koronaduođaštusa bokte čájehit ahte sii leat ollásit boahkuhuvvon dahje buohcan covid-19 dávdda. (10 jándora riikii boahtima njoammunerrema lea vejolaš loahpahit, jos sáhttá duođaštit negatiivva koronaiskosa áramusat golbma jándora maŋŋil go riikii lea boahtán).

ÁDI čujuha dasa ahte mátkkošteaddjit “koronaduođaštusa haga” dahket 7 proseantta buot registrerejuvvon mátkkošteddjiin, ja 4 proseantta njoammuduvvon olbmuin. ÁDI árvvoštallama vuođul ii leat erremis šat nu stuora mearkkašupmi epidemiija leavvamii iige buohcceviessokapasitehtii Norggas, ja sin mielas ii leat šat dárbu riikii boahtima errennjuolggadusaide danne go njoammundilli lea rievdan.     

-Lean ovttaoaivilis ADI:n ahte go leat nu unnán mátkkošteaddjit geain ii leat koronaduođaštus, de dat ii váikkut nu ollu njoammundillái, ja danne lea dál áigi loahpahit riikii boahtima errennjuolggadusaid, dadjá dearvvašvuođa- ja fuolahusministtar Ingvild Kjerkol. – Errennjuolggadusaid loahpaheapmi mielddisbuktá ahte mii beassat johtileappot rahpat servodaga, ja olbmuide šaddá álkibun mátkkoštit. Dat addá positiivvalaš servodatekonomalaš váikkuhusaid bargoeallimii oppalaččat ja mátkkoštanealáhussii erenoamážit. 

Mátkkošteaddjit fertejit ain iskkahit ja registreret iežaset go bohtet Norgii. Sii galget ovdal go bohtet Norgii čájehit negatiivva koronaiskosa, jos eai sáhte čájehit koronaduođaštusa bokte ahte sii leat ollásit boahkuhuvvon dahje buohcan covid-19 dávdda. Lea dehálaš muittuhit ahte buohkat geat bohtet Norgii fertejit iskkahit iežaset jos leat ožžon vuoiŋŋahatsymptomaid, ja mannat isolašuvdnii jos koronaiskkus lea positiiva. Sii, geat juo leat njoammunerremis besset eret erremis gaskaija, ođđajagemánu 26.beaivvi.  

-Dehálaš sivva manne mu mielas lea riekta loahpahit riikii boahtima errennjuolggadusaid lea, ahte mii fertet njoammunerrema árvvoštallat riikii boahtima errengáibádusaid ektui. Njoammunerrengáibádus, mii guoská lagašolbmuide geat eai gula seamma viessodollui dahje vástideaddji lagaš olbmuide, lea juo loahpahuvvon. Ođđajagimánu 26.beaivvi rájes sáhttet olbmot geat ásset seamma viesus ja vástideaddji vuogi mielde lagaš olbmot váldit iskosa juohke beaivve dan sadjái go mannat njoammunerremii, dadjá Kjerkol.

Riikii boahtima errennjuolggadusaid sáhttá fas bidjat fápmui jos njoammundilli rievdá dahje jos bohtet ođđa virusvariánttat mat gáibidit beaktilis ráddjendoaimmaid.

Ráđđehus áigu ollislaččat árvvoštallat buot riikii boahtima ráddjehusaid, nu go ee. iskkahannjuolggadusaid rádjarasttildeamis, ja almmuhit daid guovvamánu álggus. 

Loga preassadieđáhusa: Iskosat buhtadit lagašoktavuođaid njoammunerrema