Stáhta lea fállan 139,3 miljovnna kruvnnu dán jagáš boazodoallošiehtadussii

Dát sisdoallu lea eanet go 1 jagi boaris. Danne sáhttet dieđut leat boarásmuvvan.

Stáhta lea fállan 139,3 miljovnna kruvnnu dán jagáš boazodoallošiehtadussii

Fálaldat joatká gustovaš rámma mii lea 136,1 miljovnna kruvnnu, 3,2 miljovnna kruvnnu lasáhusain mii galgá geavahuvvot doaibmabijuide daid orohagain mat eai beasa geavahit dálveguohtumiid Ruoŧas. Dat eai leat ovdal ruhtaduvvon boazodoallošiehtadusa bokte.

Odne geigii stáhta iežas fálaldaga Boazodoallošiehtadallamiidda.
Odne geigii stáhta iežas fálaldaga Boazodoallošiehtadallamiidda. Govva: Eanandoallo- ja biebmodepartemeanta

Stáhta fálaldat addá boazoealáhussii vejolašvuođa viidáset joatkit ja ovddidit ealáhusa ceavzilis ealáhussan guhkesáiggi perspektiivvas. Stáhta evttoha joatkit ja láhčit ealáhusdoaimmaid daid boazodolliid ektui geaid váldoealáhus lea boazodoallu.   

Boazosápmelaččain lea leamaš hui buorre ekonomalaš ovdáneapmi. Vihtta maŋimuš jagi lea bohccobierggu buvttadanhaddi lassánan 48 proseanttain. Boazosápmelaččat geaid váldoealáhus lea boazodoallu vuoruhuvvojit stáhta fálaldagas, joatkin dihte dán positiivva ovdáneami. Dan lassin vuoruhuvvojit ja nannejuvvojit dálá ortnegat mat dorjot lassiealáhusaid ásaheami ja ovdáneami.

Ođđajagimánu 2020 lei Finnmárkkus hui heajos guohtundilli. Heajos guohtundilli čájeha man dehálaš heahtegearggusvuođafoanda lea go ealáhus vásiha heajos guohtundili. Stáhta šiehtadallanlávdegoddi várre ge 1,0 milj.kruvnnu heahtegearggusvuođafondii.

Bohccobierggus lea guhkit áiggi juo leamaš buorre márkandilli. Dat lea positiivvalaččat váikkuhan buvttadanhaddái. Stáhta fálaldagas vuoruhuvvojit doaibmabijut mat dahket vejolažžan eanet njuovvat ja vuovdit bohccobierggu ja bohccobiergobuktagiid, maiddái danne vai bohccobierggu márkandilli bissu ja joatkašuvvá.  

– Stáhta fálaldagas lea čielga profiila. Fálaldat láhčá dili boazodollui vai dat ovdána ealáhussan ja boazoeaiggádat vuoruhuvvojit geaid váldoealáhus lea boazodoallu. Fálaldat čuovvu ráđđehusa boazodoallopolitihka, dadjá Stáhta šiehtadallanlávdegotti ekspedišuvdnahoavda Anne Marie Glosli.

Boazodoallošiehtadusa šiehtadallamat álget guovvamánu 12.b., ja Boazodoalu Váldošiehtadusa mielde galget šiehtadallamat loahpahuvvon guovvamánu loahpageahčen.