Čavge áibmonuoskkidanráji

Almmustahttináigodat Solberga ráđđehus

Almmustahtti: Dálkkádat- ja birasdepartemeanta

Ráđđehus čavge gavjanuoskkidanráji gávpogiin. Gielddat galget boahtte jagi rájes čuovvolit ođđa gáibádusaid, ja jos lea dárbu bidjat doaibmabijuid johtui biilajohtolahkii.

-Dainna čavgemin háliidat mii dearvvašvuođa buoridit ássiide. Ođđa dieđut čájehit ahte smávit gavjapartihkkalat  váikkuhit negatiivvalaš dearvvašvuhtii eanet go álggos jáhkiimet. Dan geažil čuovvolat mii ávžžuhusaid maid leat ožžon, ja čađahat čavgadeabbo mearrádusaid 2016 rájes, cealká dálkkádat- ja birasministtar Tine Sundtoft.

Birasdirektoráhta, Geaidnodirektoráhta, Álbmotdearvvašvuođainstituhta ja Dearvvašvuođadirektoráhta ávžžuhusaid vuođul áigut luonddunuoskkidanláhkaásahusas čavget gavjanuoskkidanráji 2016 rájes. Gavjjaid jahkeávdnasat ja jándorávdnasiid čoahkit (PM10 ja PM2,5) gáržžiduvvojit. Nitrogenadioksiida árvoráját bissot rievddatkeahttá, direktoráhtaid ávžžuhusaid mielde.

Evttohuvvon čuvgejumiiguin ja gáržžidemiiguin fertejit  gávpogat árvvoštallagoahtit ođđa doaibmabijuid ja váikkuhangaskaomiid. Direktoráhtaid čielggadeapmi duođašta ahte čavgejuvvon árvorájiid lea vejolaš čuovvolit jos doaibmabijut leat servodatekonomalaččat gánnáhahtti. Direktoráhtat árvalit raporttas doaibmabijuid omd. jávkadit geaidnogavjjaid, unnidit leaktoráddjehusaid oanehis geaidnogaskkain ja geahpedit biikadeahkaid geavaheami.        

-Mun čuovun mielde ahte gielddain leat dárbbašlaš veahkkeneavvut čoavdit áibmokvalitehta hástalusaid. Ráđđehus áigu dan geažil omd. rahpat vuollegis luoitinsonaid daid gávpogiin mat dan háliidit. Gielddain leat juo dál ollu váikkuhangaskaoamit, omd. biikadeahkkadivat. Lea dehálaš geahpedit nuoskkideami earret eará biilajohtolagas. Mus lea luohttámuš dasa ahte báikkálaš politihkkarat gávdnet rivttes čovdosiid buoridan dihte áimmu, dadjá Tine Sundtoft.

Dálkkádat- ja birasdepartemeanta áigu árvvoštallat gáržžidit eanet árvorájáid jagi 2020 rájes.  Árvvoštallan dahkko ođđa dieđuid vuođul 2018:s, nu go direktoráhtat ávžžuhit raporttastis. Servodatekonomalaš ávkkástallan ja nuoskkidangeahpedeami čađahanvejolašvuođat galget leat oassin diehtovuđđosis.