Syrias fievrredit vuosttaš guorpmi kemihkalaš vearjjuid

OPCW ja ON nannejit, ahte vuosttaš skiipa, mas leat Syria kemihkalaš vearjjut, lea vuolgán Latakia hámmangávpogis. Proseassa, man olis fievrredit Syria kemihkalaš vearjjuid duššadeapmái, lea nappo álggahuvvon.

OPCW ja ON nannejit, ahte vuosttaš skiipa, mas leat Syria kemihkalaš vearjjut, lea vuolgán Latakia hámmangávpogis. Proseassa, man olis fievrredit Syria kemihkalaš vearjjuid duššadeapmái, lea nappo álggahuvvon.

- Lea positiiva, ahte leat álggahan kemihkalaš vearjjuid fievrredeami Syrias. Dát lea ođđa lávki dan guvlui, ahte ollašuhttit ON ja OPCW mearrádusa, man ulbmil lea duššadit riikka kemihkalaš vearjjuid. Dál lea mávssolaš johtileamos lági mielde fievrredit loahpaid Syria kemihkalaš vearjjuin Latakiai, ja dan bokte olggos riikkas, olgoriikaministtar Børge Brende dadjala.  

OPCW-ON-operašuvnna (Joint Mission) mandáhtan lea fuolahit, ahte syrialaš kemihkalaš vearjjuid duššadit sihkkareamos lági mielde ja ahte dat dahkkojuvvo čavga riikkaidgaskasaš áigerámma siskkobealde. Norgga-Dánmárkku oassi barggus lea fievrredit kemihkalaš vearjjuid Syrias OPCW-ON-operašuvnna olis.

-Mis lea buohkain geatnegasvuohta váldit iežamet oasi ovddasvástádusas ja dan láhkai ovddidit riikkaidgaskasaš ráfi ja dorvvolašvuođa. Lean rámis, go mearrajohtolatriikkat Norga ja Dánmárku sáhttet nu oanehis ráhkkananáiggiin searvat, go ON ja OPCW dan bivdet, ja ahte mii sáhttit searvat dárbbašlaš fievrredanskiippaiguin ja militearafatnasiiguin dán bargui. Lean ilus go leat álggahan dán mávssolaš barggu, suodjalusministtar Ine Eriksen Søreide cealká.

Dánskalaš fievrredanskiipa fievrreda odne vearjjuid Syrias, ja dan mieđuštit norgalaš fregáhtta KNM Helge Ingstad, dánskalaš fregáhtta ja Kiinná ja Ruošša mearrafatnasat. Norgga gálvoskiipa MV Taiko lea maid gearggusin fievrredit loahpaid kemihkalaš vearjjuin.

Syria kemihkalaš vearjjut fievrreduvvojit riikkas ja duššaduvvojit ON sihkarvuođaráđi resolušuvnna 2118 mielde ja OPCW ollašuhttinráđi mearrádusaid vuođul.

Norga doarju maid OPCW foandda, mainna ruhtadit sihkarvuođaráđi resolušuvnna 2118 čađaheami ja duššadit Syria kemihkalaš vearjjuid.