Aktiver Javascript i din nettleser for en bedre opplevelse på regjeringen.no

Wara áigu viiddidit gildosa bággonáittosdili vuostá

Ráđđehus háliida viiddidit heađuštangeatnegasvuođa ja garraseappot kriminaliseret dikkehis bággonáittosdili. Evttohus lea okta máŋgga evttohusas rievdadit ráŋggáštuslága mii dál lea gulaskuddamis.

Heađuštangeatnegasvuohta mielddisbuktá ahte juohkehaš gii diehtá dihto duođalaš láhkarihkkumiid, galgá geahččalit heađuštit daid váiddedettiin politiijaide dahje eará láhkai. Oassi láhkarihkkumiin mat fátmmastuvvojit evttohuvvon viiddideamis, leat bággonáittosdilli, mánáidnáittosdilli ja groava olmmošgávppašeapmi.

Sierra ráŋggáštusmearrádus dikkehis bággonáittosdili hárrái

– Mii evttohat viiddidit heađuštangeatnegasvuođa ja sierra ráŋggáštusmearrádusa mii čuohcá eahpeformálalaš ja oskkolaš bággonáittosdillái. Dát leat doaibmabijut mat sáhttet váikkuhit dasa ahte beaktileappot eastadit groava kriminalitehta mánáid ja nuoraid vuostá, dadjá justiisa-, gearggusvuođa ja sisafárrenministtar Tor Mikkel Wara (OvB).

Evttoha heađuštangeatnegasvuođa vuolledábiid vahágahttima hárrái mii guoská buot ámmátjoavkkuide

Ráđđehus áigu ráŋggáštuslága rievdadanevttohusas maiddái viiddidit heađuštangeatnegasvuođa vuolledábiid vahágahttima hárrái mii galgá guoskat buohkaide, ii ge dušše ovttaskas ámmátjoavkkuide. Dát lea dehálaš doaibmabidju dáistalit vuolledábiid vahágahttima vuostá ja negatiivvalaš sosiála stivrejumi vuostá.

Ráđđehus áigu čavget ráŋggáštusa báhčit politiijaid vuostá

Ráŋggáštusrádjá báhčit politiijaid vuostá lea dál gitta golmma jagi giddagas, jus dahku ii rehkenasto goddingeahččaleapmin. Ráŋggáštusrádjá evttohuvvo viiddiduvvot logi jahkái, mas unnimusráŋggáštus lea golbma jagi.  

– Báhčin politiijaid vuostá lea hirbmat duođalaš ja váikkuha politiijaid vejolašvuođaide čađahit virgedoaimmaid ja várjalit álbmoga vuđolaččat. Dákkár daguid várra lea stuoris, maiddái dábálaš olbmuide. Berre árvvoštallat čavget ráŋggáštusa doarvái čájehan dihtii man duođalaččat dákkár dagut leat, dadjá Wara (OvB).

Ráŋggáštusmerren go váldá virgevearjjuid politiijain

Gulaskuddamii sáddejuvvo maiddái evttohus ráŋggáštusmerremii mii čuohcá sutnje gii politiijain váldá virgevearjju. Dákkár dahku lea duođalaš, ja das sáhttá leat stuorra vahátriska, muhto masa eará ráŋggáštusmerren ii dárbbaš dál čuohcat.

Háliida nannet almmolaš virgeolbmuid suddjema

Gulaskuddannotáhtas lea maiddái evttohus nannet almmolaš virgeolbmuid ráŋggáštusrievttálaš suoji eará láhkai cielaheami ja loavkašuhttima vuostá mii mávssaha almmolaš váldedoaimmaheami.

Evttoha sihkkut áiggehuvvangeatnegasvuođa muhtun ráŋggáštusvuloš daguide main jápmin lei boađus

Dasa lassin evttohuvvo sihkkut áiggehuvvanáigemeari muhtun ráŋggáštusvuloš daguide jus dain lei jápmin boađus, ee. groava tortura, groava rumašvahágahttin, groava illásteapmi lagaš oktavuođas, vuolledábiid groava vahágahttin ja groava rievideapmi.

Gulaskuddanáigemearri lea cuoŋománu 15.b. 2019.

Høring - forslag til endringer i straffeloven mv. (avvergingsplikt, tvangsekteskap, skyting mot politiet m.m.) 

 

Bajás