Ráđđehus lasiha vahátbuhtadusa mánáide
Historjjálaš arkiiva
Almmustahttináigodat Solberga ráđđehus
Almmustahtti: Justiisa- ja gearggusvuođadepartemeanta
Preassadieđáhus | Nr: 10 – 2018 | Almmustahtton: 16.02.2018 | Maŋimuš ođasmahttojuvvon: 26.02.2018
Stáhtaráđis mearriduvvui odne ahte bidjat fápmui rievdadusaid mat mearkkašit ahte buhtadusdássi mánáide ja nuoraide bajiduvvo mearkkašahtti olu.
– Mánát geat roasmmohuvvet eallinahkái, ovdamearkka dihte biilalihkohisvuođas, galget oažžut rievttes buhtadusa. Ođđa njuolggadusat sihkkarastet vuoiggalaš ja rievttes buhtadusmávssuid mánáide, dadjá Justiisa-, gearggusvuođa- ja sisafárrenministtar Sylvi Listhaug (OB).
Mánáidbuhtadusnjuolggadusat galget gustot vahágiidda mat bohtet ovdan dan rádjái go son gii lea vahágahtton deavdá 19 jagi, dálá njuolggadusaid ektui mat gustojit 16 jagi rádjái. Viidáseappot de sirrejuvvo sisaboahtomassinbuhtadusa ja bistevaš vahágiidbuhtadusa meroštallan. Buhtadusmerošteapmi go massá ruovttubargonávccaid sirrejuvvo sierra poastan, nu ahte lea čielggas ahte nuorra vahágahtton olbmuin sáhttá leat riekti oažžut dakkár buhtadusa. Šaddá buoret árvvoštallanvuođđu go merošteapmi dahkko guovtti oasis, mas maŋit oassi maŋiduvvo dassá go vahágahtton olmmoš lea deavdán 21 jagi.
Dát ođđa njuolggadusat vahátbuhtaduslágas ja láhkaásahus standardiserejuvvon sisaboahtomassinbuhtadusa birra mánáide biddjo fápmui njukčamánu 1.b. 2018 rájes.