Áigu sihkkarastit eurohpalaš ekonomiija

- Norga lea otne fállan 55 miljárdda kruvnnu sturrosaš loana Riikkaidgaskasaš valuhttafondii (IMF) stargadit eurohpalaš ja internašunála ekonomiija ja nu suddjet Norgga ekonomiija ja bargosajiid, cealká stáhtaministtar Jens Stoltenberg.

Ođđa loanat sihkkarastet ahte Riikkaidgaskasaš valuhttafoanddas leat doarvái loatnajuolludannávccat čoavdit miellahtturiikkaid ruhtadanváttisvuođaid. Eurohpá riikkaide lea maid dát dehálaš.

-Arvat olu Norgga gávpe- ja ovttasbargoguoimmit vásihit dál váttis ekonomalaš dili.  Mis lea stuorra beroštupmi dasa ahte bisuhit stargadis riikkaidgaskasaš ekonomiija ja ruhtadili, dadjá Stoltenberg.

Norgga loatnafálaldat eaktuda stuorit riikkaidgaskasaš searvama.

Euroriikkat lohpidedje vuossárgga juolludit 150 miljárdda euro sturrosaš loana IMF geavahussii.  Dasa lassin leat maiddái eará EO-riikkat olggobealde euroavádaga lohpidan juolludit ođđa loanaid. Maiddái riikkat olggobealde Eurohpá árvvoštallet veahkehit.

Jos Stuorradiggi dán dohkkeha, de sáhttá IMF háldet Norgga loatnaruđaid dábálaš loatnadoaimmaide. Ruđat eai leat de várrejuvvon sierra guovlluide dahje riikkaide, muhto galget  olámuttos buot IMF miellahtturiikkaide.