5 100 jahkedoaimma leat lassánan Norgga buohcceviesuin 2008 rájes 2011 rádjai
Historjjálaš arkiiva
Almmustahttináigodat Regjeringen Stoltenberg II
Almmustahtti: Ođasmahttin-, hálddahus- ja girkodepartemeanta
Ođas | Almmustahtton: 27.05.2013 | Maŋimuš ođasmahttojuvvon: 14.06.2013
Norgga buohcceviesut leat ožžon 5 100 eanet jahkedoaimma áigodagas 2008 – 2011. Dearvvašvuođasuorgi lea ožžon sullii njeallje jahkedoaimma logi jahkedoaimmas seamma áigodagas. Maiddái politiija, universitehtat ja allaskuvllat ja Stáhta geaidnodoaimmahat leat ožžon mealgat olu jahkedoaimmaid. Dan čájehit “Sysselsetting i statsforvaltningen” guorahallama ođđalogut maid Statistihkalaš guovddášdoaimmahat lea ráhkadan, ja maid Ođasmahttin-, hálddahus- ja girkodepartemeanta muhtun muddui lea ruhtadan.
Norgga buohcceviesut leat ožžon 5 100 eanet jahkedoaimma áigodagas 2008 – 2011. Dearvvašvuođasuorgi lea ožžon sullii njeallje jahkedoaimma logi jahkedoaimmas seamma áigodagas. Maiddái politiija, universitehtat ja allaskuvllat ja Stáhta geaidnodoaimmahat leat ožžon mealgat olu jahkedoaimmaid. Dan čájehit “Sysselsetting i statsforvaltningen” guorahallama ođđalogut maid Statistihkalaš guovddášdoaimmahat lea ráhkadan, ja maid Ođasmahttin-, hálddahus- ja girkodepartemeanta muhtun muddui lea ruhtadan.
- Bargiid lassáneapmi stáhtahálddahusas govve movt ráđđehus politihkalaččat vuoruha servodaga dehálaš doaimmaid. Dearvvašvuođadirektoráhta rumašlaš dearvvašvuođabálvalusa jagi 2012 doaibmaraportta bokte leat mii ožžon diehttevassii ahte doaimmat buohcceviesuin bohtet ain lassánit ja ahte eanet divššohasat ožžot divššu, cealká ođasmahttin-, hálddahus- ja girkoministtar Rigmor Aasrud.
Guorahallan čájeha ahte jagi 2011 ledje sullii 226 000 jahkedoaimma stáhtahálddahusas. Jagi 2011 barge eatnašat buohcceviesuin, 39 proseantta, universitehtain ja allaskuvllain 14 proseantta, Suodjalusas gávcci proseantta, Politiija- ja áššečuoččáldahttisuorggis guhtta proseantta ja NAV:s vihtta proseantta. Stáhtalaš suorggi jahkedoaimmat leat lassánan sullii 14 800 jahkedoaimmain jagi 2008 rájes jagi 2011 rádjai.
25 proseantta stáhtahálddahusa bargiin lea badjel njeallje jagi oahppu universitehta- ja allaskuvlla dásis. Girkosuorggis lea guhkimus oahppoáigi olles 78 proseantta, birasgáhttensuorggis 61 proseantta ja sisafárrejeddjiidmuddensuorggis 78 proseantta.
- Lean ilus go mis Norggas lea gelbbolaš stáhtahálddahus. Riikkaidgaskasaš buohtastahttimat maid Máilmmibáŋku (Verdensbanken) lea dahkan čájehit ahte norgga hálddahus lea buresdoaibmi ja okta dain buoremusain máilmmis, dadjá Aasrud.
Nissonolbmuid jahkedoaibmaoassi stáhtahálddahusas leai 55 proseantta jagi 2011. Spesialistadearvvašvuođabálvalusas leai nissonolbmuid oassi 74 proseantta, ja váikkuha eanemusat nissonolbmuid alla loguide stáhtas.
Analysat leat dahkkon StatRes loguid vuođul, mii lea vuogádat mii galgá stáhta statistihkaid ovddidit ja gaskkustit. OHD lea muhtun muddui ruhtadan StatRes-prošeavttaid, ja dál lea vuosttas geardde go SGD almmuha dárkilis loguid stáhtahálddahusa barggolašvuođas.