Sámegielat almmolaš hálddašeamis
Artihkal | Maŋimuš ođasmahttojuvvon: 04.05.2022 | Gielda- ja guovlodepartemeanta
Máhttu sámi kultuvrra ja gielaid birra lea mávssolaš almmolaš hálddašeames, vai sámegiel geavaheddjiide sihkkarasto buorre gulahallan almmolaš eiseválddiiguin. Sámelága giellanjuolggadusat addet sámegiela geavaheddjiide vuoigatvuođa sámástit gulahaladettiineaset almmolaš eiseválddiiguin dihto oktavuođain ja surggiin.
Sámelága giellanjuolggadusaid vuođul galgá jorgalit sámegillii lágaid ja láhkaásahusaid, maidda olles sámi álbmogis dahje sámi álbmoga oasis lea beroštupmi. Almmuhusaid, maid čállet sámi giellalága hálddašanguovllu olles álbmogii dahje oassái álbmogis, galgá almmuhit sihke sáme- ja dárogillii. Sihke sáme- ja dárogillii galget leat maid skovit, maid olbmot sáddejit hálddašanguovllu báikkálaš dahje guovllu dási almmolaš orgánaide.
Sámelága giellanjuolggadusat leat unnimus dási njuolggadusat. Buot almmolaš doaimmaid ávžžuhit váldit vuhtii sámásteddjiid viidábut go láhka geatnegahttá.
Gielddain ja fylkkagielddain lea mávssolaš doaibma sámegiela nannemis daid guovlluin, gos sápmelaččat ásset. Sámegiela hálddašanguovllu gielddain lea erenoamáš ovddasvástádus fállat dieđuid ja bálvalusaid sápmelaččaide. Sámegiela ja ‑kultuvrra gealbu lea mávssolaš, vai gielddat nagodit fállat buriid bálvalusaid sámi álbmogii.
Fylkkagielddaid rolla lea ovddidit sámegielaid iežaset fylkkain. Dat galget fuolahit ahte sihke hálddahusas ja bálvalusain, main dain lea ovddasvástádus, lea sámegiela ja -kultuvrra gelbbolašvuohta. Joatkkaskuvllat gullet fylkkagielddaid ovddasvástádusa vuollái, ja lea mávssolaš ahte oahppit, geain lea vuoigatvuohta sámegieloahpahussii, ožžot fálaldaga.
Regjeringen.no -neahttasiiddus leat sámegielsiiddut ja departemeanttaid ávžžuhit jorgalit eanet artihkkaliid sámegillii; sihke áššiid birra mat gusket sápmelaččaide ja áššiid mat gusket olles álbmogii. Lea ásahuvvon jorgalanbálvalus Departemeantta bálvalanorganisašuvnna vuollái, mii jorgalahttá teavsttaid regjeringen.no -siidui.