Biebmu ja geavaheaddjit
Artihkal | Maŋimuš ođasmahttojuvvon: 07.03.2022 | Eanadoallo- ja biebmodepartemeanta
Norgga geavaheddjiin lea stuorra beroštumi movt borramuš ráhkaduvvo, reidejuvvo ja vuvdojuvvo Norggas. Geavaheddjiid oaiviliid deattuhit nannosit borramušpolitihkka hábmemis.
Biebmo- ja eanandoallopolitihka váldoulbmilin lea sihkkarastit geavaheaddjit fidnejit doarvái oadjebas ja iešguđetlágan biepmuid main lea buorre kvalitehta govttolaš haddái. Geavaheddjiid sávaldagat ja válljemat váikkuhit biebmopolitihka hábmemii.
Maid sisttisdoallá biebmu?
Buorre gálvomerken lea mearrideaddjin geavaheaddji diđolaš biebmoválljemii. Geavaheaddjái galgá álki árvvoštallat borramušaid sisdoalu, gos biebmu boahtá, man álbmái lea ja movt dan galgá gieđahallat.
Juovlamánus 2014 mearriduvvo ođđa njuolggadusat biebmomerkemii Norggas, vai geavaheddjiide álkida lohkat ja ipmirdit maid biepmut sisttisdollet.
Ođđa biebmomerkenvuohki, man vuođđun leat EO-gáibádusat, mielddisbuktet earret eará ahte buvttadeaddjit galget almmuhit makkár šaddoolju biepmus lea, leat go adnon goanstaávdnasat ja man ollu čáhci lea biddjon.
Gálvomerken galgá maid veahkehit válljet dearvvašlaš biepmuid. Nøkkelhullet lea oktasaš davviriikkalaš eaktodáhtolaš dearvvašvuođamearka, mii lea álkidan geavaheddjiide fidnet dearvvašlaš biepmuid.
Bagadallat geavaheddjiid
Beroštupmi báikkálaš borramušaide ja erenoamáš borramušaide maid lassána. Vuođđudus Norsk Mat (Norgga biebmu) Spesialitet-mearka veahkeha geavaheddjiid gávdnat báikkálaš erenoamáš borramušaid main lea buorre kvalitehta, main buvttadeaddji sáhttá duođaštit erenoamášvuođa buktagis ja máisttus.
Beskyttede Betegnelser-mearka dáhkida buvttadeddjiid juridihkalaččat ahte sin gálvomearkka eai oaččo earát geavahit, ja veahkeha geavaheddjiid gávdnat buktaga mas lea erenoamáš geográfalaš gullevašvuohta dahje árbevierru.
Ø-mearka dáhkida geavaheddjiide borramuš lea ekologalaš. Dušše buktagat maid norgga dárkkistanorgána Debio, dahje vástideaddji olgoriikkalaš orgána lea dohkkehan, sáhttet vuvdot ekologalaš borramuššan Norggas.
Nyt Norge-mearka álkida geavaheddjiide válljet norgga biepmuid gávppis.
Biebmohattit
Norgga biebmo- ja eanandoallopolitihkka ii galgga dušše boanddaide ja biebmobuvttadeddjiide sihkkarastit buori ovdáneami. Dat galgá maiddái sihkkarastit ahte geavaheaddjit fidnejit kvalitehtabiepmu govttolaš haddái. Danin barget ge eiseválddit ulbmillaččat buvttadeaddjeindustriijain biebmohattiid ektui.
Biebmohattit Norggas leat divrasepmosiid gaskkas Eurohpás, muhto eanaš eurohpálaččaid ektui norgalaččat golahit unnit oasi nettodietnasis borramuššii.