Aktiver Javascript i din nettleser for en bedre opplevelse på regjeringen.no

Ruhtaspeallanpolitihkka

Ráđđehus áigu fievrridit politihka man vuođđun lea sosiála ovddasvástádus ja váldá vuhtii speallansorjavaččaid, seammás go deattuha dárbbu rievdadeapmái teknologalaš ovdáneami geažil.

Ollugiidda lea speallan hávskes lustadoaibma, ja spealut buktet sisaboađuid ávkkálaš doaimmaide servvodagas. Ráđđehus joatká gáibádusain ahte ruhtaspealuid sisaboađut Norggas galget juogaduvvot ideála ulbmiliidda, seammás go doarjjaortnegat galget váikkuhit organisašuvnnaid ovdánahttimii iežaset eavttuid mielde. Ráđđehus joatká oktovuoigatvuođamodeallain, ja árvvoštallá vejolašvuođaid rahpat vejolašvuođaid eambbo humanitára ja eaktodáhtolaš oasálaččaide siskkobealde ESA-dohkkehuvvon rámmaeavttuid.

Norgga ruhtaspeallanmárkana regulerema bajitdási mihttomearri lea sihkkarastit ahte lotteriijat ja ruhtaspealut doaimmahuvvojit oadjebas ja vástideaddji vugiiguin, ráddjen dihte heajos speallanmeanuid. Reguleren galgá dan lassin láhčit dili dasa ahte lotteriijat ja ruhtaspealut šaddet buorit sisaboahtogáldut servodatberošteaddji ja humanitára doaimmaide, valáštallamii ja kultuvrii. Dat mihttomearri lea ruhtaspeallanlágas mearriduvvon, ja sullasaš ulbmilmearrádusat leat lotteriijalágas ja láhkaásahusas gilvospealuid birra.

Stuorimus ruhtaspealut Norggas doaimmahuvvojit oktovuoigatvuođamodealla bokte. Norsk Tipping lea ožžon oktovuoigatvuođa doaimmahit ruhtaspealuid, ja Norsk Rikstotos lea oktovuoigatvuohta doaimmahit gilvospealuid. Kulturdepartemeanta galgá ovddasvástidit Norsk Tipping AS eaiggátvuođastivrejumi. Modealla galgá sihkkarastit ahte ruhtaspeallanmárkan bures dárkkistuvvo ja stivrejuvvo almmolaččat.

Dan lassin ožžot searvvit ja joavkkut lobi doaimmahit priváhta vuorbádemiid.

Norgga ruhtaspeallanpolitihkka ja dálá oktovuoigatvuođamodealla galgá ovddasvástidit  golbma almmolaš ulbmila:

  • vuhtiiváldit dan ahte eastadit heajos speallanmeanuid
  • vuhtiiváldit dan ahte eastadit ekonomalaš boasttugeavahemiid, ja
  • vuhtiiváldit dan ahte ráddjet priváhta dietnasa

Norgga ruhtaspeallanpolitihka ulbmilat eai leat ovttaárvosaččat. Ruhtaspeallanpolitihka deháleamos mihttomearri lea joatkit ovddasvástádusa.

Stuorradiggedieđáhus "Meld. St. 12 (2016-2017) Alt å vinne - Ein ansvarleg og aktiv pengespelpolitikk"  ovddiduvvui 16. beaivve juovlamánu 16. b. 2016is.

Dieđáhus muitala ráđđehusa ruhtaspeallansuorggi politihka birra. Ráđđehus lea oaidnán dárbbu ođđasit ollislaččat geahččat ruhtaspeallanpolitihkas sivas daid maŋemuš jagiid ruhtaspeallanmárkana ovdáneami. Guovddáš gažaldat mii boahtá ovdan dieđáhusas lea dat mo galget hábmet vástideaddji ruhtaspeallanpolitihkka boahtte áiggis. Dieđáhus čilge otná ruhtaspeallanmárkana dili, ruhtaspeallansuorggi muddema, ja guorahallá áššáigulli doaimmaid hábmen dihtii ollislaš ja vástideaddji ruhtaspeallanpolitihka mii vuhtiiváldá sosiálapolitihkalaš beroštumiid suorggis. Dieđáhusas lasihuvvo ahte dálá golbma lága ruhtaspeallansuorggis galget ovttastuvvot ođđa láhkan. Departemeanta lea álggahan dán barggu.

Bajás