Buot gonagaslaš resideanssain, stáhta viesuin ja militeara orrunbáikkiin galgá levgejuvvot beallestákkus jápminbeaivvi rájes dassážii go hávdádusmeanut leat loahpahuvvon. Hávdádusmeanut leat Oslo duopmogirkus. Áigi ii leat vuos mearriduvvon.

Jápminbeaivve čuojahuvvojedje girkobiellut buot riikka girkuin, ja seamma dahkkojuvvo hávdádusbeaivve. Norgga girku doallá morašipmilbálvalusaid miehtá riikka, ja dohko leat buohkat buresboahtin.

Hávdádusbeaivve galgá gonagas Harald V muittašuvvot minuhta jaskatvuođain miehtá riikka dii. 13.00 rájes dii. 13.01 rádjái. Sihke álggus ja loahpas dien minuhta čuojihit buot girkobiellut riikkas golmma geardde.

Ráđđehus ja stáhtalaš doaimmat čalmmustahttet nationála morašáigodaga máŋgga láhkái gitta hávdádusbeaivvi rádjái. Fágalaš aktivitehtat ja lágideamit sáhttet čađahuvvot nu go dábálaččat, muhto deattuhuvvo ahte lágidemiin lea ávddalaš rámma mii čájeha ahte riika lea morrašis. Sosiála lágideamit, main ii leat fágalaš ulbmil, šluhttejuvvojit dahje maŋiduvvojit.

Earret dán eai leat mearriduvvon dárkilet láidehusat nationála morašáigodaga birra. Eanas doaimmat ja lágideamit sáhttet čađahuvvot nu go dábálaččat, muhto lea lunddolaš čalmmustahttit ahte riika lea morrašis. Ráđđehus lea almmuhan láidehusa dasa movt ássit, organisašuvnnat, fitnodagat ja suohkanat sáhttet čalmmustahttit nationála morašáigodaga.

Buot suohkaniid ráđđeviesuide biddjo kondolánsagirji. Stuorát suohkaniin sáhttá sátnejođiheaddji árvvoštallat eanet sajiide lágidit kondolánsagirjji. Suohkanat leat maid bivdojuvvon čujuhit báikki suohkanis gosa ássit sáhttet cahkkehit gintaliid dahje guođđit dearvuođaid muittašan dihte gonagas Haralda. Oslos sáhttet dan dahkat Šloahta luhtte.

Stáhtaministara kantuvra lea sádden reivve Stáhtahálddašeddjiide ja departemeanttaide mas leat dieđut nationála morašáigodaga birra.