Det skal flaggast på halv stong frå kongelege residensar, statlege bygningar og militære forlegningar frå i dag og fram til etter gravferda. Gravferda skal finne stad i Oslo domkyrkje. Tidspunktet er enno ikkje avklart.

Det vart ringt med kyrkjeklokker i alle kyrkjene i landet i dag, og det same vil skje på gravferdsdagen. Den norske kyrkja vil arrangere sørgjegudstenester over heile landet som alle er velkomne til å delta i.

På gravferdsdagen skal kong Harald V minnast med eitt minutt stille over heile landet frå kl.13.00 til kl. 13.01. Både starten og slutten av dette minuttet skal markerast med tre klokkeslag frå alle kyrkjene i landet.

Regjeringa og statlege verksemder vil markere den nasjonale sørgjeperioden fram til gravferdsdagen på fleire måtar. Aktivitetar og arrangement av fagleg karakter kan verte gjennomførte som planlagt, men det vert lagt vekt på at arrangementa har ei verdig ramme som markerer at landet er i sorg. Sosiale arrangement som ikkje har fagleg karakter vert avlyste eller utsette.

Ut over dette gjeld ingen klårt definerte reglar om nasjonal sørgjeperiode. Dei fleste aktivitetar og arrangement kan gjennomførast som normalt, men det er naturleg å markere at landet er i sorg. Regjeringa har lagt ut ei rettleiing der det vert gitt råd om korleis innbyggjarar, organisasjonar, verksemder og kommunar kan markere den nasjonale sørgjeperioden.

Det leggjast ut kondolanseprotokoll på rådhuset i alle landets kommunar. I større kommunar kan ordføraren vurdere om det bør leggjast ut kondolanseprotokollar fleire stader. Kommunane er også bedne om å etablere ein stad i kommunen der innbyggjarane kan tenne lys eller leggje ned ei helsing for å minnast kong Harald. I Oslo kan dette gjerast på Slottsplassen.

Statsministerens kontor har sendt brev til Statsforvaltarane og departementa med informasjon om den nasjonale sørgjeperioden.