Bohccobiergobuvttadeapmi lea ollu lassánan:
– Hui buorre ođas, dadjá eanadoallo- ja biebmoministtar Sandra Borch
Ođas | Almmustahtton: 27.10.2021 | Eanadoallo- ja biebmodepartemeanta
Diibmá njuvvojuvvui ja vuvdojuvvui uhcán bohccobiergu. Guohtunroassu dálvit ja giđđat 2020 lei dasa váldosivalaš. Dán jagi njuovvanlogut čájehit ahte buvttadeapmi lea mealgat buoret go diibmá. Bohccobiergu vuvdojuvvo dál ollu eanet dan sivas go guohtumat dán jagi leat oalle buorit.
Dán jagi váldonjuovvamat leat bures boahtán johtui. 42.vahku rádjai leat 27.984 bohcco njuvvojuvvon, 11.544 bohcco eanet go diibmá. Miessenjuovvan lea lassánan 78 proseanttas 87 prosentii.
– Dat lea hui buorre ođas, dadjá eanadoallo- ja biebmoministtar Sandra Borch. – Ráđđehusa mihttomearri lea nannet ja ovdánahttit boazodoalu ja láhčit ealáhussii buoret árvobuvttadeami. Ealáhusas leat ollu vejolašvuođat, maid leat deattuhan Hurdalšiehtadusas. Diimmá guohtunroassu lei garas ja lossat ollu boazodolliide. Lean ilus go dát jahki orru šaddamin ollu buoret guohtumiid dáfus, mii ealáhussii addá vuođu ovdáneapmái.
Bohccobiergu lea šaddan hui bivnnut
Das leat ollu vejolašvuođat, maiddái go geahččá geavaheddjiid oaidninsajis. Guorahallamat čájehit ahte ollugat háliidit borrat eanet bohccobierggu, ja háliidit maid eanet dieđuid gos bohccobiergu lea fidnemis, mo bierggu málestit ja mo Norggas barget boazoduoluin.
– Bohccobiergu lea luondduvuđot, albma, máisttolaš, ja dearvvašlaš ja das ii leat ollu buoidi. Okta mu favorihtta lea Biđus. Jos háliidat bierggu málestit, de gávnnat Matprat neahttasiidduin ollu málestanrávvagiid das mo albmás ja njálgga biebmu galgá málestit, loahpaha Borch.
Norgga bohccobierggu váldologut
Boazodoallu lea organiserejuvvon siiddaide. Siiddaide gullet bearašlahtut dahje bargojoavkkut geat ovttas doaimmahit iešguđet boazobargguid.
Giđđaeallu lea daid maŋimuš jagiid leamaš sullii 200 000-220 000 bohcco, ja das lea sullii 77% álddut, 17% miesit ja 6% varrásat. Riikkadásis lea gaskamearálaččat njuvvojuvvon sullii 35% giđđaealus.
Gárgáma davábealde vuvdet badjelaš 70 proseantta buot njuovvanbohccuin. Njuovvanbohccuid deaddu lea dábálaččat losit lulliguovlluin go davviguovlluin.
Dábálaš jagi njuvvet sullii 1600 tonna bohccogoruda, mas buvttaduvvo sullii 1100-1200 tonna bohccobiergu. Eanaš vuvdojuvvo borramušgávppiin.