30 miljovnna ruvnno fitnodatálggaheapmái ja ođđaháhkamii

– Mii háliidat eanet čeahpes fitnodatálggaheddjiid ja eanet ja eanet kommersialiseremis dutkama jurdagiid, cealká ealáhusministtar Monica Mæland. Fitnodatálggaheami ja ođđaháhkama vuoruheami olis lassána juolludeapmi 30 miljovnna ruvnnuin.

Ráđđehus árvala nannet fitnodatálggaheami áŋgiruššama 15 miljovnna ruvnnuin jagi 2014, Innovašuvdna Norgga álggahandoarjagiid bakte. Maiddái Norgga Dutkanráđi dutkanvuođustuvvon ođđaháhkan (Ođasteapmi2020) nannejuvvo 15 miljovnna ruvnnuin.

– Norgga ealáhusdoaibma dárbbaša nannoset vuođu. Fitnodatálggaheaddjit ođasmahttet ealáhusdoaimma ja sin han leat mielde ásaheames daid fitnodagaid mat boahtte áiggis vuođđudit midjiide birgejumi. Dutkanvuođustuvvon ođđaháhkan sáhttá dagahit vejolašvuođaid ođđa ealáhusdoaimmaide ja doalvvuhit Norgga ovddasguvlui, dadjá ealáhusministtar Monica Mæland.

Álggahandoarjja
Álggahandoarjja galgá dagahit ahte mii gávdnat eanet čeahpes fitnodatálggaheddjiid geat ásahit fitnodagaid mat sáhttet ahtanuššat ja mat buvttadit juoga mii lea earenoamáš sihke sisriikkalaččat ja riikkaidgaskasaččat. Sii ožžot unnit ruhtasupmi vai sáhttet geahččalit ja iskkadit iežaset fitnodatjurdagiid. Supmi galgá dagahit prošeavttaid «háhkangergosat». Doaibmabidju galgá buoridit vejolašvuođa fitnodatálggaheddjiide ja fitnodagaide, mat leat álggahuvvon vuolil golbma jagi áigi, oažžumis unnit doarjaga.

Oktiibuot sáhttá Innovašuvdna Norga dán ortnega bakte juolludit doarjagiid sullii 90 miljovnna ruvnno ovddas.

Ođasteapmi2020
Ráđđehus árvala nannet dutkanvuođustuvvon ođđaháhkama (Ođasteapmi 2020) áŋgiruššama 15 miljovnna ruvnnuin.

Ođasteapmi2020 galgá vuolggahit árvoháhkama dakko bakte go gávppálaččat ávkkástallet dutkanbohtosiid mat lea čađahuvvon universitehtain, allaskuvllain, dearvvašvuođadoaimmahagain ja instituhtain. Dutkanvuođustuvvon ođđaháhkan ja gávppálašvuohta vuolggaha vejolašvuođaid ásahit ođđa ealáhusdoaimmaid. Ođasteapmi2020 doarju doaimmaid mat dagahit ahte dutkanbohtosat váldojit adnui. Prográmma bakte juolluduvvo doarjja oasálaččaide geat dagahit ahte dutkanbohtosat jovdet márkanii ja aitto álggahuvvon fitnodagaide mat lea vuođđuduvvon dutkanásahusaid bohtosiid ja jurdagiid vuođul.

Jagi 2014 Ođasteapmi2020 oppalaš rámma lea danin váile 136 miljovnna ruvnno. Ealáhus- ja guolástusdepartemeanta juolluda 125,75 miljovnna ruvnno, ja Máhttodepartemeanta ges 10 miljovnna ruvnno.