Gielddasuorgái árvaluvvo 4,5 – 5 miljárdda eanet 2015:s

Gielddaid sisaboahtu stuorru 4,5 gitta 5 miljárdda kruvnnuin. Gaskal 4,2 ja 4,5 miljárdda kruvnnu leat friddjaboađut.

Gielddaid sisaboahtu stuorru 4,5 gitta 5 miljárdda kruvnnuin. Gaskal 4,2 ja 4,5 miljárdda kruvnnu leat friddjaboađut.

- Ráđđehusa árvalus jagi 2015 gielddaekonomiija hárrái lasiha friddjaboađuid mat leat seammá go maŋimuš jagiid gaskamearri.  Gielddat ožžot eanet ruhtadoarjaga maid sii sáhttet geavahit ovdamearkka dihte nannet máhtolašvuođa skuvllain, buoridit dearvvašvuođa- ja sosiálabálvalusaid ja nanusmahttit sosiála sihkkarvuođafierpmádaga, celkkii gielda- ja ođasmahttinministtar Jan Tore Sanner ovddidettiin gielddaid čađahanplánaárvalusa.  

Sisaboađuid lassáneami ferte árvvoštallat earret eará olmmošlogu lassáneami ektui. Olmmošlogu  lassáneapmi gáibida hukset eanet gielddalaš bálvalusaid.  

Gielddat ožžot gaskal 3,75 ja 4,25 miljárdda kruvnnu friddjaboađuid lassiruđas. Dan lassiruđas ožžot gielddat  200 miljovnna kruvnnu nannet gielddalaš fálaldagaid eastadit gárihuhttinváttisvuođaid ja veahkehit sin geainna leat psyhkalaš váttut.

- Mii leat vuoruhan ássiid geat eanemusat dárbbašit veahki gielddas. Gielddat ožžot min árvalusa bokte buoret vejolašvuođa veahkehit ássiid geainna leat gárihuhttinváttisvuođat ja psyhkalaš dearvvašvuođahástalusat – ja nannet gielddaid dearvvašvuođabálvalusaid nugo dearvvašvuođaguovddážiid,  jortamovrabálvalusa ja skuvladearvvašvuođabálvalusa, dadjá Sanner.

Friddjaboađuid lassiruđas ožžot fylkkagielddat gaskal 0,25 – 0,5 miljárdda kruvnnu. Dáid ruđain galget 150 miljovnna kruvnnu geavahuvvot fylkkageainnuid divodemiide. 

- Árvaluvvon lassidoarjja addá vejolašvuođaid buoridit gielddalaš bálvalusaid, sihke viidodaga ja kvalitehta dáfus. Dasa lassin lea dál vejolaš beavttálmahttit resursageavaheami gielddasuorggis. Jos gielddasuorgi dál nagoda geavahit beavttálmahttin vejolašvuođaid, de lea sis vejolaš lasihit gielddalaš bálvalusat vel eanet. Ráđđehusas leat čielga vuordámušat dasa ahte gielddasuorgi bisánkeahttá  álkida, ođasmahttá ja buorida bálvalusaid, cealká Sanner.

Stuorrundoarjja bajiduvvo
Boahtte jagi gielddaid čađahanplánas árvaluvvo rievdadit gielddaid vástevaš stuorrundoarjaga. Stuorrundoarjja bajiduvvo gielddaide gos olmmošlohku erenoamážit lassána, ja dan olis dárbbašit eanet investeremiid.

- Gielddat gos olmmošlohku erenoamážit lassána, ožžot dál ráđđehusa árvalusa bokte buoret vejolašvuođaid investeret olmmošlogu lassáneami ektui. Lassáneapmi gáibida stuora investeremiid, nugo hukset mánáidgárddiid ja skuvllaid, ja buoridit siskkáldas struktuvrra. Mii bajidat stuorrundoarjaga gielddaide gos olmmošlohku erenoamážit lassána  ja dan olis dárbbašit stuora investeremiid, dadjá Jan Tore Sanner.

Sisaboahtorámma loahppa árvalus ovddiduvvo stáhtabušeahta bokte golggotmánus.