Áigut ráhkadit doaibmabidjopáhkaid eastadit njoammuma
Preassadieđáhus | Nr: 15/22 | Almmustahtton: 03.02.2022 | Stáhtaministara kantuvra, Dearvvašvuođa- ja fuolahusdepartemeanta
Ráđđehus háliida addit buoret einnostahttivuođa surggiide mat eanemusat šaddet gillát koronaráddjendoaimmaid geažil. Danne leat ráhkadeamen bajitdási rámmavuogádaga mii sisttisdoallá njoammuneastadanpáhkaid, maid lea vejolaš geavahit jos dilli dan gáibit.
-Mis galgá leat buorre gearggusvuohta vai nagodat hálddašit vejolaš njoammunleavvama ja ođđa virusvariánttaid. Mii fertet bures ráhkkanit vai nagodat hálddašit sávakeahtes dáhpáhusaid. Njoammuneastadanpáhkat addet buoret einnostahttivuođa. Mii fertet fuolahit ahte mis lea buorre gearggusvuohta vai johtilit sáhttit doaimmaid álggahit riikkarájá alde jos ođđa virusat leavvagohtet, dadjá stáhtaministtar Jonas Gahr Støre.
Njoammundilli, sihke oanehit ja guhkit áigái lea ain hui eahpečielggas. Doaibmabidjopáhkat leat dehálaš váikkuhangaskaoamit gearggusvuođabarggus ja daid galgá geavahit jos pandemiijadilli rievdá, ja jos ráddjendoaimmaid šaddá dárbu geahpedit dahje čavget. Doaibmabijut galget heivehuvvot konkrehta njoammundillái ja vuođđuduvvot Álbmotdearvvašvuođainstituhta ja Dearvvašvuođadirektoráhta fágalaš rávvagiidda.
-Njoammuneastadandoaibmabijut leat garrasit čuohcan olles servodahkii ja ekonomiijai. Doaibmabidjopáhkat nannejit ja buoridit vuosttažettiin gearggusvuođa ja dat galget geavahuvvot ođđa ráddjendoaimmaid oktavuođas mat buorebut galget heivehuvvot servodaga dárbbuide ja sávaldagaide, ja vihkkedallot ávkki ja goluid ektui.
Háliidat evttohusaid iešguđet surggiin
Dearvvašvuođadirektoráhta ja Álbmotdearvvašvuođainstituhtta leat ovddidan evttohusaid doaibmabidjopáhkaide (liŋka evttohussii – boahtá). Doaibmabidjopáhkaid viidáset barggus áigot iešguđet fágadepartemeanttat searvadahttit organisašuvnnaid ja áirasiid iežaset fágasurggiid siskkobealde vai ožžot eanet evttohusaid. Mihttomearri lea ráhkadit doaibmabidjopáhkaid mat leat nu deaivilat go vejolaš.
-Mii áigut searvadahttit guovddáš aktevrraid vai doaibmabidjopáhkat šaddet nu buorit go vejolaš, ja vai iešguđet suorggit leat bures ráhkkanan geavahišgoahtit páhkaid, dadjá dearvvašvuođa- ja fuolahusministtar Kjerkol.
Jos doaibmabidjopáhkat galget leat nu deaivilat go vejolaš, de dárbbašat eanet gelbbolašvuođa servodatváikkuhusaid birra. Ráđđehus lea aiddobeliid ásahan áššedovdijoavkku čuvget ja árvvoštallat ráddjendoaimmaid ja doaibmabidjopáhkaid servodatlaš váikkuhusaid.
Ođđa koronastrategiija
Ráđđehus lea dál ođasmahttimin strategiija- ja gearggusvuođaplána hálddašit covid-19-pandemiija. Rievdaduvvon strategiija ovddiduvvo giđđat 2022 ja galgá čielggadit movt virusiin sáhttit eallit guhkit áiggi badjel. Bajitdási ulbmil lea hehttet pandemiija šaddamis stuora noađđin ovttaskas olbmuide ja olles servodahkii. Doaibmabidjopáhkat leat dehálaš gaskaoamit gearggusvuođaplánabarggus.