Dán giđa boazosuvdin lea álgán
Ođas | Almmustahtton: 20.04.2024 | Maŋimuš ođasmahttojuvvon: 22.04.2024 | Eanadoallo- ja biebmodepartemeanta
Dihtet go ahte juohke giđa suvdojuvvojit badjel 8000 bohcco geasseorohagaide Davvi-Romssa ja Finnmárkku sulluin ja čakčat fas ruovttoluotta nannámii?
Máŋga orohaga dáin guovlluin eai birgeše dán suvdima haga – mii doaimmahuvvo fatnasiin, prámáin, mii sáhttá gitta gáddái buktit bohccuid. Ortnet ruhtaduvvo boazodoallošiehtadusa bokte, man stáhta, Eanandoallo- ja biebmodepartemeantta bokte, ja Norgga boazosápmelaččaid Riikkasearvi (NBR) sohpet jahkásaččat.
– Dán jagi boazodoallošiehtadusas leat mii soahpan joatkit otná suvdinortnega, ja juolludus dasa lasihuvvo 5,5 miljovnna ruvnnos 6 miljovdnii. Lassáneapmi galgá sihkkarastit ahte suvdin sáhttá buorebut heivehuvvot dárbbuide, lohká eanandoallo- ja biebmoministtar Geir Pollestad (Gb).
Boazodoallit geat dárbbašit suvdit, sáhttet dan ohcat Romssa ja Finnmárkku stáhtahálddašeaddjis, gii árvvoštallá ohcama siidaoasi historjjálaš gullevašvuođa vuođul guvlui ja suvdindárbbu vuođul. Siidaoasis ferte leat sihke duohta ja geográfalaš dárbu suvdit. Stáhtahálddašeaddji ráhkada dasto suvdinplána, mas siidaoasit geaidda suvdin lea dohkkehuvvon, leat vuoruid ožžon.
Eambbo suvdima birra
Historjjálaččat leat sullot ja njárggat adnon boazoguohtuneanamin. Ovdal vuojahedje boazodoallit bohccuideaset vuonaid ja nuriid rastá dáidda sulluide. Vuosttaš boazosuvdin fatnasiin lei birrasiid 1850 Sállanii. Álggogeahčen 1900-logu huksejedje eiseválddit ovttageardánis prámá, mainna suvde ealu earret eará Ártnisullui. Suodjalusa gáddeprámá adnui vuosttaš geardde gaskkamuttus 1960-logu. 70-logu mielde šattai boazosuvdin geasseorohagaide Romssas ja Finnmárkkus jahkásaš doaibman. Boazosuvdin šattai dalle dábáleabbo danne go iešguđet sisabahkkemat ja huksemat giddejedje boazodoalu árbevirolaš johtingeainnuid, ja šattai álkit beassat sulluide jus suvdá bohccuid. Dál ii leat šat Suodjalus, muhto priváhta fitnodat, mii eaiggáduššá ja doaimmaha suvdinprámá.