Aktiver Javascript i din nettleser for en bedre opplevelse på regjeringen.no

Bollestad deaivvadii boazodoallostivrrain

Eanandoallo- ja biebmoministtar Olaug Bollestad lea vuosttaš geardde deaivvadan Boazodoallostivrrain juovlamánu 12. b. Ođđa Boazodoallostivra nammaduvvui geassemánus 2019.

Eanandoallo- ja biebmoministtar deaivvada jahkásaččat boazodoallostivrrain ovdal juovllaid. Jahkásaš čoahkkin lea diehtojuohkin- ja gulahallanarena politihkalaš jođiheami ja Boazodoallostivrra gaskkas. Jahkásaš čoahkkimat leat vuođđun oktasaš ipmárdussii boazodoalloealáhusa hástalusaid ja vejolašvuođaid hárrái.

Dát áššit digaštallojuvvojedje čoahkkimis:

  • Boazodoallolága buhtadusnjuolggadusat
  • Ođđa meahcceláhkaevttohusa čuovvoleami stáhtus
  • Raportačuovvoleapmi eananjuohkinrievtti gelbbolašvuođa birra boazodoalu siskkáldas dilálašvuođain ja soabadeami birra
  • Stáhtus ođđa boazoguohtunkonvenšuvdna-barggus Norgga ja Ruoŧa gaskkas
  • Divadat boazodoalloealáhusas
  • Boraspirebuhtadusaid maŋŋonan meannudeapmi
  • Našuvnnalaš rámma bieggafápmui – bargu viidáseappot

Munnje lei stuora vásáhus fitnat boazodoalloealáhusa guossis árat dán čavčča, ja árbevirolaš boazodoalu boazodolliid beroštupmi ja oainnut leat hirpmáhuhttán mu, seammás go sii leat boahtteáiggediđolaččat ja beroštit joatkit ja ovdánahttit boazodoalu eallinfámolaš ealáhussan. Ceavzilis boazodoalloealáhus gáibida maiddái buori hálddašeami, ja mun lean hui giitevaš dán diehtojuohkima ovddas Boazodoallostivrras. Munnje lea hui ávkkálaš gullat stivrra oainnuid áigeguovdilis áššiin, ja illudalan ovttasbargat stivrrain lahka ja bures ovddosguvlui, dadjá eanandoallo- ja biebmoministtar Olaug Bollestad ovtta kommentáras.

Eanandoallo- ja biebmoministtar Olaug Bollestad deaivvadii vuosttaš geardde ođđa boazodoallostivrrain duorastaga juovlamánu 12. b.
Eanandoallo- ja biebmoministtar Olaug Bollestad deaivvadii vuosttaš geardde ođđa boazodoallostivrrain duorastaga juovlamánu 12. b. Govva: Eanandoallo- ja biebmodepartemeanta.

Boazodoallostivrra birra

Boazodoallostivra lea boazodoallohálddahusa, boazodutkamiid ja bagadallanbálvalusa fágalaš ráđđeaddi, ja galgá meannudit daid áššiid mat čuvvot boazodoallolágas. Boazodoallolága § 71 mielde galgá nammaduvvot Boazodoallostivra mas leat čieža miellahtu ja persovnnalaš várrelahtut geain Eanandoallo- ja biebmodepartemeanta nammada njeallje lahtu ja várrelahtuid ja Sámediggi golbma lahtu ja várrelahtuid.

Boazodoallostivrra miellahtut leat:

  • Inge Ryan, jođiheaddji, ođđa Namsos suohkana ráđđeolmmái.
    • Várrelahttu: Christian Rekkedal, Vestlándda Fylkkamánnu eanandoallodirektevra.
  • Siri Vigmostad, Larvika diggerievtti sundi.
    • Várrelahttu: Kjetil Linde Holo, advokáhtta advokáhttafitnodagas Bjørge – Skaaraas og Co AS.
  • Asgrim Opdal, eanandoalli ja Filefjell boazosearvvi jođiheaddji.
    • Várrelahttu: Ragnhild Normann Jakobsen, Vågå boazosearvvi boazovázzi.
  • Ragnhild Sparrok Larsen, boazodoalli Nordlándda boazodoalloguovllus.
    • Várrelahttu: Ole Johan Johnsson Eira, boazodoalli Romssa boazodoalloguovllus.
  • Inge Even Danielsen, boazodoalli Lulli-Trøndelága/Hedmárkku boazodoalloguovllus.
    • Várrelahttu: Bjørn Thomas Åhrèn, sámepolitihkkár/ráđđeaddi Davvi-Trøndelága boazodoalloguovllus.
  • Inger Marie Gaup Eira, vuosttašamanueansa Sámi allaskuvllas/boazodoalli Oarje-Finnmárkku boazodoalloguovllus.
    • Várrelahttu: Inger Marit Eira Åhrèn, buohccidivššár/boazodoalli Davvi-Trøndelága boazodoalloguovllus.
  • Leif Anders Somby, boazodoalli Nuorta-Finnmárkku boazodoalloguovllus.
    • Várrelahttu: Anders Somby jr., boazodoalli Nuorta-Finnmárkku boazodoalloguovllus.
Bajás