Bušeahtas dárkilit dálkkádatraporteren

Dálkkádat- ja birasdepartemeanta čuovvola dálkkádatlága dán jagáš bušeahttaproposišuvnnas.

Ođđa dálkkádatláhka geatnegahttá ráđđehusa addit jahkásaš čilgehusa dálkkádatluoitimiin 2018 rájes. Dál Dálkkádat- ja birasdepartemeanta ovddalgihtii čuovvola láhkagáibádusa.

-Dálkkádatláhka gáibida dárkilit raporterema Stuoradiggái earet eará luoitimiin ja dálkkádatbohtosiin almmuhuvvon bušeahtas. Vaikko láhka easka gusto 2018 rájes, de mii raporteret dárkileappot juo dán bušeahtas, dadjá dálkkádat- ja birasministtar Vidar Helgesen.

Stáhtabušeahta jahkásaš raporteremat muitalit Stuoradiggái mot Norga sáhttá joksat dálkkádatmihtuid, mat bušeahta dálkkádatbohtosat leat ja guđe guvlui luoitimat rivdet/jorret.

Muhtun čuoggáid lea metodalaččat gáibideaddji čuovvulit, ja departemeanta lea čielggadeamen mot dán galgá bargat. Muhto juo dán jagáš bušeahtas čilgejuvvojit muhtin čuoggát dárkileappot go ovddit jagiid.

-Luoitinosiid maid mii ovdanbuktit dán jagáš bušeahtas čujuhit dan guvlui ahte mis lea vejolaš ii-earregeatnegas suorggis deavdit boahttevaš 2030-mihtuid go čuovvulit politihkalaš mihttomeriid ja áigumušaid ja čađahit vel eanet doaimmaid, dadjá Vidar Helgesen.