Historjjálaš soabalašvuohta loahpalaš ráfišiehtadusas Colombias
Historjjálaš arkiiva
Almmustahttináigodat Solberga ráđđehus
Almmustahtti: Stáhtaministara kantuvra
Preassadieđáhus | Nr: 86/16 | Almmustahtton: 24.08.2016 | Maŋimuš ođasmahttojuvvon: 05.09.2016
Colombia ráđđehus ja FARC almmuhedje odne ahte leat soahpan loahpalaš ráfišiehtadusas. Šiehtadus loahpaha šiehtadallamiid mat leat bistán badjel njeallje jagi. Vearjoriiddus, mii lea bistán badjel 50 jagi, leat 220 000 olbmo goddon ja miljovnnaid mielde olbmot leat báhtareaddjit riikkas.
- Dát lea vuoitu olles colombialaš álbmogii ja mun sávan lihku beliide, dadjá stáhtaministtar Erna Solberg.
Vearjoriidu, mii lea bistán badjel 50 jagi ja dagahan gillámušaid riikka álbmogii, lea dál nohkamin. Loahpalaš šiehtadus vuolláičállojuvvo allaáiggálaš dilálašvuođas Colombias ja dasto šaddá das álbmotjienasteapmi.
- Ráfišiehtadusa áigumuš lea čoavdit olu dain vuođđohástalusain mat álgoálggus dagahedje riiddu lážedettiin dili govddit politihkalaš searvamii, eatnamiid háhkamii ja kokabuvttadeami molssaeavttuide, dadjá olgoriikaministtar Børge Brende. Norga áigu ain veahkehit beliid čuovvolit šiehtadusa, deattuha son.
Norga lea leamaš mielde ráfi- ja soabadanbarggus Colombias máŋgalot jagi, ja lea ovttas Cubain láhčán šiehtadallamiid Havannas.
Ráfišiehtadusat álggahuvvojedje virggálaččat Oslos 2012 golggotmánus.