Dearvvašvuođabargiide fállet goalmmát koronaboahkuid

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Ráđđehus lea mearridan fállat dievasmahttinboahkuid korona vuostá dearvvašvuođabargiide, geat jotkkolaččat barget divššohasaiguin, geain lea alla riska buohccát hejot.

– Mii háliidit oadjebas bargodili sidjiide, geat barget vuosttaš linnjás, ja hehttet dávdda njoammumis. Danin ráđđehus lea odne mearridan, ahte dearvvašvuođabargiide geat barget divššohasaiguin, galget fállat goalmmát boahkuid. Mii álgit singuin, geat ovddemužžan leat ožžon boahkuid. Gielddat ja ÁDI plánejit dál mo ollašuhttit fálaldaga, nu ahte gielddaid bargonoađđi ii šatta menddo lossadin, dadjá dearvvašvuođa- ja fuolahanministtar Ingvild Kjerkol.

Álbmotdearvvašvuođainstituhtta ávžžuha fállat dievasmahttinboahkuid dearvvašvuođa- ja fuolahanbálvalusa dearvvašvuođabargiide, geain lea erenoamáš alla riska buohccát sakka covid-19:in. Vuosttažettiin lea sáhka buhcciidsiiddaid ja ruovttubálvalusa bargiin ja earáin geat vuođđo- ja spesialistadearvvašvuođabálvalusas barget sullasaš vugiin divššohasaiguin.

Soitet viiddidit
– Ávžžuhusa soitet maŋŋá viiddidit, nu ahte guoská eará dearvvašvuođabargiide. Dan árvvoštallat njoammundili ja ođđa dieđuid vuođul, deattasta Kjerkol.

Vuođđodearvvašvuođabálvalusas barget 265 000 bargi divššohasaiguin, spesialistadearvvašvuođabálvalusas fas 124 000 bargi. Sullii beallái sis fállet dál ođasmahttinboahkuid.

Iešguđet bargiidjoavkkuid gaskkas ja divššohasaid gaskkas leat erohusat man muddui sii leat dakkár dilis, ahte dávda sáhttá njoammut divššohasas bargái, ja makkár čuovvumušat das sáhttet leat. Riska čuovvu ovdamearkka dihte das man lahka, dávjá ja guhkes áiggi bargi lea divššohasain oktavuođas, ja man stuorra riska divššohasas lea buohccát hejot jos sutnje njoammu covid.

Váldde boahkuid
– Ávžžuhan maid sin, geat eai leat váldán vuosttaš ja nuppiid boahkuid, ahte váldet daid, sihke iežaset ja earáid dihte, bargoskihpáriid dihte ja suddjen dihte divššohasaid, dadjá Kjerkol.

ÁDI guorahallamiid mielde badjel 70 proseantta dearvvašvuođabargiin leat miehtemielalaččat dievasmahttinboahkuide, jos eiseválddit ávžžuhit daid váldit.