Aktiver Javascript i din nettleser for en bedre opplevelse på regjeringen.no

Digitaliseren lea temá go Stuoradiggedieđáhus sámepolitihka 2020 birra almmuhuvvo

– Ráđđehus lea mearridan ahte digitaliseren galgá temán go boahtte jagi almmuha stuoradiggedieđáhusa sámepolitihka birra, cealká gielda- ja ođasmahttinministtar Monica Mæland.

Ráđđehus almmuha juohke giđđasešuvnnas dieđáhusa Stuoradiggái sámi áššiid birra. Sámediggi lea cuiggodan ahte gávdnojit menddo uhcán digitála bálvalusat sámegillii.

– Ráđđehus lea ráhkadan strategiija almmolaš suorggi digitaliseremii, man mihttomearri lea ahte buohkat galget beassat vásihit almmolaš suorggi mii geavaha digitaliserenčovdosiid fállat ássiide boahtteáigái heivehuvvon ja oktilis bálvalusaid. Dál mii áigut ráhkadit dieđáhusa mii earet eará čilge mo mihtut galget ollašuhttot sámi giellageavaheddjiid ektui, cealká digitaliserenministtar Nikolai Astrup.

– Ollu buorre bargu dahkko ovddidit sámi giellateknologiija, ovdamearkan lea Divvun ja Giellatekno. Earret eará leat sámi digitála sátnegirjjit ráhkaduvvon, divvunprográmmat ja boallobeavdi, ja sámi digitála oahpponeavvoportála. Mun háliidan áinnas ahte diet doaimmat loktejuvvojit ja čalmmustahttojuvvojit dieđáhusas, dadjá gielda- ja ođasmahttinministtar.  

Ráđđehusa digitaliserenstrategiija almmolaš suorggi várás 2019-2025 biddjo vuođđun strategiijabargui, ja maiddái Sámedikki digitaliserenstrategiija mii dohkkehuvvui dievasčoahkkimis juovlamánu 6.b.2018. Dieđáhusa galgá maid geahččat dan oktavuođas mo ráđđehus lea čuovvulan NAČ 2016:16 Váibmogiella ja nu maiddái ođđa gielladieđáhusa barggu, maid Kulturdepartemeanta koordinere.

Vuosttaš boahtteáigái heivehuvvon dieđáhus, Dieđ. St. 31 (2018-2019) Sámi giella,  kultuvra ja servodateallin, meannuduvvui stáhtaráđis geassemánu 21.b.2019. Sámegielaid dilli lei dalle bajitdási temá. 

Gielda- ja ođasmahttindepartemeantta preassatelefovdna: 22 24 25 00

Bajás