Politiija vearjoinstruvssa rievdadeapmi
Historjjálaš arkiiva
Almmustahttináigodat Solberga ráđđehus
Almmustahtti: Justiisa- ja gearggusvuođadepartemeanta
Ođas | Almmustahtton: 13.02.2015 | Maŋimuš ođasmahttojuvvon: 02.03.2015
Justiisa- ja gearggusvuođadepartemeanta mearridii gaskaboddosaččat rievdadit vearjoinstruvssa § 10 čielggadit lea go politiijain láhkavuođđu geavahit vearjjuid terroráitagiid olis.
Rievdadusat mearkkašit ahte Politiijadirektoráhtta, Justiisa- ja gearggusvuođadepartemeantta mieđiheami mielde, sáhttá mearridit ahte politiijabálvvát eanemusat golbma mánu ožžot guoddit pistovlla beaivválaš barggus.
- Vearjoinstruvssa leai dárbu čielggadit nu ahte politiijain lea lohpi geavahit vearjjuid jos lea dárbu heađuštit dahje bissehit vearredaguid mat leat váralaččat olbmuide, dearvvašvuhtii dahje dehálaš servodatdoaimmaide. Justiisa- ja gearggusvuođadepartemeanta lea dan geažil rievdadan vearjoinstruvssa mii guoská dán čuoggái. Mun deattuhan ahte dat ii rievdat dan prinsihpa ahte norgga politiijat eai galgga guoddit vearjjuid. Vearjoinstruvssa rievdadus lea dušše gaskaboddosaš rievdadus ja dasa lea dárbu nu guhká go vásihat terroráitagiid, cealká Justiisa- ja gearggusvuođadepartemeantta stáhtačálli Hans J. Røsjorde (OB).
Departemeanta lea maid guorahallamin dárbbu rievdadit politiijalága mii guoská gaskaboddosaš vearjogeavaheapmái.
Rievdadus leai sáddejuvvon gulaskuddamii. Justiisa- ja gearggusvuođadepartemeanta lea guorahallan gulaskuddancealkámušaid ja daid vuođul rievdadan vearjoinstruvssa § 10. Politiijadirektoráhtta galgá árvvoštallat riskka ja raššivuođa politiija ovddasvástádusa ektui mii guoská dasa ahte sihkkarastit olbmuid, dearvvašvuođa dahje dehálaš servodatdoaimmaid ovdal go sáhttá addit lobi geavahit vearjjuid. Jos vearjogeavaheami eavttut leat ain devdojuvvon, de sáhttá Justiisa- ja gearggusvuođadepartemeanta mieđihit guhkidit vearjogeavahanlobi gávcci vahku hávális.