Fysalaš oahpahus čađahuvvo fas studeanttaide

Ráđđehus fámohuhttá njuolggadusaid mat gusket digitála oahpahussii, eksámenii ja gálggaid hárjehallamii. Sii ávžžuhit allaskuvllaid, universitehtaid ja fágaskuvllaid láhčit eanet fysalaš oahpahusa, nu ahte eanet studeanttat besset čuovvut oahpahusa oahpposajis. Váldonjuolggadus ovddasguvlui lea, ahte studeanttaide galgá láhččot eanet fysalaš oahpahus campusis. Ráđđehus ávžžuha studeanttaid dávjjibut iskkahit iežaset vai sáhttet fysalaččat čuovvut oahpahusa.

-Mun lean hui ilus go beassat fas čađahit oahpahusa nu go dábálaččat.  Dál leat ollu bargit ja studeanttat ožžon goalmmát boahkkodosa, ja fágaskuvllain, allaskuvllain ja universitehtain lea buorre máhttovuođđu das movt oahpahusa čađahit njoammuneastadanfágalaš dohkálaš vuogi mielde. Dan lassin áigu ráđđehus vuoruhit barggu háhkat johtilisiskosiid studeanttaide, dadjá Borten Moe.  

Ráđđehus ávžžuha maid, ahte jos oahpahus lágiduvvo luohkkálanjain, de eai berre eanet go 30 olbmo searvat vai nagodit doallat ovtta mehtera gaskka. Mehtera gaskka doallamis sáhttá spiehkastit, jos dat lea dárbbašlaš oahpahusa čađaheapmái.   

Jos oahpahus lágiduvvo auditorias gosa čoahkkanit ollu studeanttat, de fertejit buohkat čuovvut njuolggadusaid mat gustojit almmolaš lágidemiide gos gáibiduvvo čohkkát fásta mearriduvvon sajiin. Dat mearkkaša ahte oahpahussii sáhttet searvat eanemusat 200 olbmo jos leat fásta mearriduvvon sajit.

Universitehtat, allaskuvllat ja fágaskuvllat galget ain čuovvut oppalaš njoammuneastadanávžžuhusaid ahte bures biggohit, doallat gaskka nu guhkás go vejolaš, ja ahte bargit ja studeanttat bissot ruovttus jos leat buohcci dahje jos sis leat dávdamearkkat.

-Ollu studeanttain ii leat leamaš oahpahus olles lohkanbaji almmá čavga njoammuneastadandoaibmabijuid haga, ja eanaš áiggi leat sii gártan čađahit oahpahusa digitálalaččat ruovttus dahje láigolanjas. Danne lea dehálaš ahte mii eat joatkke čavga ráddjehusaid guhkit go lea dárbu, dadjá dutkan- ja alitoahppoministtar Ola Borten Moe.

Jos vel váldonjuolggadus lea ge ahte ruovttukantuvra galgá ain geavahuvvot, de rahppo maid bargiide vejolašvuohta fysalaččat leat bargosajis. Bargoaddi sáhttá individuála árvvoštallama vuođul mearridit ahte bargi galgá beassat boahtit bargui campusii, jos lea dárbu.

Johtolatčuovgamodealla ii guoskka álbmotallaskuvllaide, muhto dat fertejit čuovvut báikkálaš njoammuneastadaneiseválddiid mearrádusaid guoskevaš gielddain ja njoammuneastadanbagadusa maid suorgi ieš lea ráhkadan.

Rievdadusat bohtet fápmui bearjadaga ođđajagimánu 14.b. dii. 24.00.