Ovdasiidu

Giellavahkku, Giellavahkko, Gïelevåhkoe, Kielâokko, Ǩiõllneäʹttel

Dán váhkus ávvudit sámi giellavahku jo njealját geardde. – Sámi giellavahkku lea oktasaš ražasteapmi sámegielaid ovdii ja mii maid ávvudit sámegielaid mearkkašumi iežamet riikii, dadjá gielda- ja guovloministtar Sigbjørn Gjelsvik. Stáhtaráđđi searvvai giellavahku rahpandoaluide Snåsas sotnabeaivve golggotmánu 23. beaivve.

Snåsas lágiduvvui Sámi giellavahku almmolaš rahpan ja ON álgoálbmotgielaid logijagi almmustahttin. Doaluide serve Majestehta Gonagas, ráđđehus, stáhtaráđi Sigbjørn Gjelsvik bokte ja sámediggepresideanta Silje Karine Muotka.

ON váldočoahkkin lea mearridan, ahte 2022-2032 lea ON álgoálbmotgielaid logijahki. UNESCO vástida giellalogijagi čađaheames ja Norga lea mielde stivrenjoavkkus. Riikkadásis Sámediggi ja gielda- ja guovlodepartemeanta leat ásahan ovttasbargoforuma, mii koordinere logijagibarggu Norggas.

– Norga sáhttá searvat giellalogijagi bargui ollu vugiiguin. Mii leat ovdamearkka dihte bures ovdánan giellateknologiija reaidduid dáfus, dadjá Gjelsvik.

Giellaváhkurahpan ja giellalogijagi almmustahttin čalmmustahttujuvvui čájáhusain,konserttain ja sáhkavuoruiguin Saemien Sijtes ja Snåsahállas.

– Hálidan rámidit Saemien Siijte dainna erenoamaš čájáhusain maid leat rahkadan, ja sávvat lihkku ođđa, fiinna viesuin. Máttasámi giella, dáidda ja kultuvra leat mávssolaš oasit min kulturárbbis, dadjala Gjelsvik.

Gielda- ja guovlodepartemeanta lágida giellavahkus govvačájáhusa olgun geassemánu 7. beaivvi báikkis (7. juni-plassen), mii lea rabas geahččiide. Čájáhusa lea ráhkadan Árvu-designdoaimmahat ja das leat ođasmahttán Árbi / Arv -prošeavtta: «Giella lea min árbi. Dalle, dál ja boahtte buolvvaide». Čájáhusain buktet sámegielaid oidnosii gávpotgovvii.

– Lea mávssolaš, ahte sámegielat oidnojit servodaga iešguđet arenain. Stuorát dihtomielalašvuohta sámegielaid hárrái lea mávssolaš oassi gielaid ealáskahttimis. Ovddasvástádus sámegielaid buktit oidnosii, gullá midjiide buohkaide, dadjá Gjelsvik. 

Mii sávvat buohkaide buori giellavahku.

 

Buorre giellavahkku! Buorre giellavahkko! Buerie gïele våhkoe!