Ovdasiidu

Vuođđogeađggi eatnamii bidjan – Sámi joatkkaskuvla ja boazodoalloskuvla ja Sámi Našunálateáhter Beaivváš

Buorit olbmot. Mun sávan lihku didjiide.
Lea nu suohtas leat dáppe!

Dii lehpet bargan máŋga jagi, vai oažžubehtet buoret lanjaid.

Odne mii čalmmustahttit ahte bargu lea jođus, ahte leat beassan dán muddui ja man guvlui mii joatkit barggu.

110 jagi dassá almmustuvai Beaivvi álgu, Anders Larsena girji Abo birra ja su bajásšaddama birra dáruiduhttima áiggis.

Abo illuda sakka skuvlla álgimii. Son háliida oahppat. Muhto vásáhusat skuvllas eai duođaidge movttiidahte.

Go Abo «leai leamaš moadde beaivve skuvllas, de son dolkagođii fargga. Son láittastuvai; das go son ii ipmirdan maidige das, maid oahpaheaddji sártnui. Oahpaheaddji su mielas dušše molžžardii.»

Dáruiduhttinpolitihka geažil Abo gárttai váttis dillái.

««Son sivdnadalai ieš okto oahpu mii lei dahkan su vierisin vel dáppe ge [..], su mánnávuođa oahppásiid luhtte. [..]
« Son lei vieris, gosa ihkenassii bođii. Son lei dego badjel logu»

Abo cealká de: «Dat lei nu fuohcu láittas.»

Mu mielas son livččii sáhttán geavahit ain garrasut sániid.

Dán áigge lea dát dilli. Mii leat bidjamin vuođđogeađggi sámi joatkkaskuvlla ja boazodoalloskuvlla ja Beaivvášteáhtera ođđa vissui. Guovtti mávssolaš ásahussii, mat áimmahuššet ja ovddidit sámegiela ja sámi kultuvrra.

Jáhkán ahte Abo ja Anders Larsen livččiiga leamaš movtta, jos livččiiga lean dáppe.

Danin go dáppe oahppit ožžot máhtu, maid eai fidne gostige eará sajis min riikkas. Sámi joatkkaskuvla ja boazodoalloskuvla lea mávssolaš ásahus Guovdageainnu – ja maiddái Norgga eará guovlluid nuoraide.

Teáhter ráhkada ja addá ođđa vásáhusaid – sihke go lea johtimin ja ođđa ruovttulávddis. Ođđa viessu dáppe Guovdageainnus šaddá ereliiggán mávssolaš infrastruktuvrra oassi.

Dat šaddá boahtteáiggi viessun.

Dáppe besset ođđa jienat áhtanuššat – ovdánit ja ožžot saji ja eallima.

Mii sávvat lihku Joar Nangoi, Snøhettai, 70°N, Econorii ja Statsbyggii.

Mii sávvat lihku Sámi joatkkaskuvlii ja boazodoalloskuvlii ja sámi nationálateáhter Beaivvážii.

Illudan oaidnit go viessu lea gárvvis ja skuvla ja teáhter besset sávvat min bures boahtin dohko!