Historjjálaš arkiiva

Ii oktage galgga sáhttit jorggihit sealggát

Historjjálaš arkiiva

Almmustahttináigodat Solberga ráđđehus

Almmustahtti: Máhttodepartemeanta

Maŋemus vahkku leat mii fas gullan historjjáid man boastut sáhttá mannat jus mánát vásihit givssideami. Lea veadjemeahttun geahččat Brennpukt historjjá Arnar ja Mia birra nu ahte ii reagere morrašiin ja doaivvuhisvuođain. Sihke dan geažil man ollu givssideapmi sáhttá billistit, muhto maiddái go sii eai ožžon dan veahki maid dárbbašedje. Dat ii galgga dáhpáhuvvat.

Rahčamuša givssideami vuostá berre váldit áibbas duođalaččat. Jus mii galgat joksat ulbmila ahte ii oktage mánná ja nuorra galgga givssiduvvot skuvllas, de fertet mii buohkat – politihkkárat, skuvlajođiheaddjit, oahpaheaddjit ja váhnemat – váldit iežamet oasi ovddasvástádusas. 

Ráđđehus lea ožžon sadjái ođđa ja čavgejuvvon njuolggadusčállosa givssideami vuostá. Skuvlaálgima rájes dán čavčča lea láhkanannejuvvon ahte buot skuvllat eai obage galgga dohkkehit givssideami. Dasa lassin dadjá láhka ahte lea doaibmageatnegasvuohta buohkain geat barget skuvllas. Dat mearkkaša ahte buot skuvlabargiin lea geatnegasvuohta čuovvut mielde, dieđihit ja dahkat juoidá go oidnet ahte muhtun mánás ii leat buorre dilli. Rávisolbmot skuvllas fertet dahkat juoidá go oidnet máná gii olgguštuvvo searvevuođas, dahje oažžu fasttes kommentáraid. 

Go mii dadjat ahte ii oktage galgga jorggihit sealggát, dat mearkkaša nai ahte skuvllas lea geatnegasvuohta bargagoahtit givssidanáššiin dakkaviđe go dat dieđihuvvo. Seammás mii diehtit ahte dađibahábut ii leat álot nu ahte skuvla čuovvula dan doarvái bures. Danin mii leat álggahan ortnega mii dahká ahte oahppit ja váhnemat sáhttet váidit njuolga Fylkkamánnii. Dat addá suojeheames mánáide ja bearrašiidda mihá buoret sihkarvuođafierpmádaga. Ja dat dahká ahte eiseváldi sáhttá mihá jođáneappot bargat juoidá ja gozihit ahte skuvla duođai bargá dan maid galgá. 

Ođđa láhkaortnet suddje mihá buorebut daid mánáid mat dárbbašit dan. Numot Mánáidáittardeaddji dajai go ráđđehusa evttohus ovdanbiddjui: “Orru leame nu ahte duššindahkama áigi lea nohkan.” 

Lea rahčamuš bargat hehtteme givssideami, ja mii fertet buohkat veahkehit. Dál mis lea ođđa ja mihá buoret njuolggadusčálus. Máhttoministtarin lea danin mu čielga diehtu buohkaide geat servvoštallet mánáiguin ja nuoraiguin beaivválaččat: Mis ii leat šat ovttasge lohpi jorgalit sealggát!