Koronaiskannjuolggadusat ložžejuvvojit Svalbárdda mátkkiide
Ođas | Almmustahtton: 03.02.2022 | Dearvvašvuođa- ja fuolahusdepartemeanta
Ráđđehus ložže dál mátkkoštannjuolggadusaid mat gusket Svalbárdda mátkkiide. Dat mearkkaša, ahte Svalbárdda ássit, ollásit boahkuhuvvon olbmot, ja sii geat leat buohcan covid-19 dávdda eai dárbbaš šat iskkahit iežaset ovdal go vulget Svalbárdii. Njuolggadusrievdadus álkidahttá Svalbárdda ássiid ja eará mátkkošteddjiid mátkkošteami nannáma ja Svalbárdda gaskka.
-Spiehkasteapmi iskangáibádusas, ahte ii dárbbaš šat váldit koronaiskosa ovdalgo vuolgá Svalbárdii addá buoret eallindili buot Svalbárdda ássiide, báikkálaš ealáhusaide ja mátkeealáhussii erenoamážit. Almmatge ii leat vel áigi loahpahit iskannjuolggadusaid oalát. Dearvvašvuođasuorggi kapasitehta Svalbárddas lea ráddjejuvvon ja jos ollugat buohccájit oktanaga ja buohcanjávkan lassána, de dat dagaha stuora hástalusaid Svalbárdda servodahkii, dadjá dearvvašvuođa- ja fuolahusministtar Ingvild Kjerkol.
Diibmá ovdal juovllaid go omikronvirus leavvagođii, váldui fas atnui gáibádus ahte buohkat geat mátkkoštit Svalbárdii galget čájehit negatiivva koronaiskosa ovdal go vulget. Dál eai dárbbaš čájehit negatiivva teastta, jos sáhttet duođaštit ahte sii ásset Svalbárddas, dahje jos koronaduođaštusa bokte sáhttet čájehit ahte sii leat ollásit boahkuhuvvon dahje buohcan covid-19 dávdda. Buohkat geat bohtet Svalbárdii galget ain váldit SARS-CoV-2 iskosa mii lea váldojuvvon 24 diimmu siste maŋŋil go Svalbárdii leat boahtán.
-Lean hui ilus go geahpádusat mátkkoštanráddjehusain gustogohtet maiddái Svalbárda-servodagas. Seammás lea servodagas ollu njoammun, ja gearggusvuohta Svalbárddas lea hui rašši. Danne fertet ain bisuhit muhtun njoammuneastadandoaimmaid Svalbárddas, dadjá justiisa- ja gearggusvuođaministtar Emilie Enger Mehl.
Spiehkasteapmi iskangáibádusas, ahte iskkahit iežas ovdal go vuolgá Svalbárdii lea mearriduvvon earret eará Dearvvašvuođadirektoráhta ávžžuhusaid vuođul.
Njuolggadusrievdadus boahtá fápmui guovvamánu 1.b. dii. 23.00.