Lávdegoddi sotnabeairabas buvddaid

Láhka mii mudde sotnabeaigávppašeami, ii rievdaduvvo. Ráđđehus nammada lávdegotti mii viidát galgá guorahallat ášši sotnabeairabas buvddaid birra. Lávdegotti jođiha Vestfolda fylkkamánni Erling Lae. Lávdegottis lea viiddes mandáhtta ja čoahkkádus.

- Dálá njuolggadusat eai leat doarvái buorit, daid ferte ođasmahttit ja álkidahttit ja dahkat vuoiggaleabbon sihke geavaheddjiide ja ealáhusaide. Eanet ahte eanet norgalaččat diŋgojit gálvvuid neahtas ja ožžot beaivválašgálvvuid ruoktot. Dat mearkkaša ahte fidnosuorggis lea garrasat gilvu mii sáhttá čuohcat beaivválašgálvobuvddaid bargosajiide. Mii fertet heivehit lága sotnabeairabas buvddaid birra dálá áigái, dadjá kulturministtar Linda Hofstad Helleland.

Lea stuorra dárbu geahčadit lága mii mudde sotnabeaigávppašeami. Fásta vuovdinbáikkit galget leat gitta sotnabeivviid ja eará bassebeivviid. Leat seammás olu spiehkastannjuolggadusat dihtolágan buvddaid várás, nugo smávit borramušbuvddaide, gilvvagárdebuvddaide ja vuovdinbáikkiide turistasajiin. Dát botnjá gilvvu iešguđetlágan buvddaid gaskkas. Áiggi mielde rivdet geavaheddjiid vierut ja gávppašandábit. Neahttagávppašeapmi lea ovdamearkka dihtii šaddan olu dábáleabbon, ja diekkár rievdadusat leat mielde hábmemin dálá muddema. Dán galgá lávdegoddi geahčadit dárkileappot.

Stáhtaráđđi lea odne nammadan lávdegotti čuovvovaš miellahtuiguin:

 

  1. Erling Lae, fylkkamánni, Tønsberg
  2. Harald Jachwitz Andersen, Virke direktevra, Oslo
  3. Gunhild Sun Bellsli, márkanhoavda, Røros
  4. Beate Milford Berrefjord, nubbinjođiheaddji, Bergen
  5. Carin Blom, detáljagávppašananalytihkkár, Stockholm, Ruoŧŧa
  6. Nils-Henrik M. von der Fehr, professor, Hurdal
  7. Gyrid Berge Giæver, seniorráđđeaddi, Romsa
  8. Kristina Hansen, sátnejođiheaddji, Davvenjárga
  9. Bjørn Næss, NHO Handel hálddahuslaš direktevra, Oslo
  10. Filip Rygg, jođiheaddji ja konsuleanta, Frogner
  11. Trine Lise Sundnes, LO, Handel og Kontor lihttojođiheaddji, Oslo
  12. Terje Søviknes, sátnejođiheaddji, Os
  13. Ragnar Wiik, jođiheaddji, Lillestrøm
  14. Ståle Økland, dutki ja girječálli, Oslo

Lávdegoddi geige iežas guorahallama 2017 čavčča.

Lávdegotti mandáhtta (girjedárogiella)