Aktiver Javascript i din nettleser for en bedre opplevelse på regjeringen.no

Ministtarčoahkkin norgga-ruoŧa boazoguohtumiid birra

Eanadoallo- ja biebmoministaris Jon Georg Dales leat maŋŋil go lea čoahkkinastán iežas ruoŧa kollegain vuordámušat gávdnat čovdosiid guohtunriidduide Davvi-Norggas norgga ja ruoŧa boazodolliid gaskka.

Seammás go norgga boazodoallit leat geahpedan boazologu ja heivehan guohtumiidda, de leat ruoŧa boazodoallit lasihan boazologu geasse- ja dálveguohtunsajiin Norgga bealde.

– Nu ii sáhte šat leat. Mii áigut rievdadit lága nu ahte lea vuođđu dárbbašlaš reguleremiidda ruoŧa boazologu dáfus norgga bealde. Dát lea dan dihte ahte buohtalastit norgga ja ruoŧa boazodolliid. Mii áigut maid gaikut lobihemiid dahkkon barttaid ja áiddiid, dajai Dale čoahkkimis giliministariin, Sven-Erik Bucht. Soai deaivvadeigga odne Davviriikkalaš Ministtarráđis Háhpáránddis Ruoŧas.

Bucht čájehii stuora ipmárdusa hástalusain ja dajai ahte dál ferte ođđa álgga dasa ahte čoavdit váttisvuođaid bistevaččat. Dán áiguba stáhtaráđit váldit ovdan maŋŋil.

Davviriikkalaš Ministtarráđđi

  • Daid vihtta davviriikkaid, Danmárkku, Suoma, Islándda, Norgga ja Ruoŧa, almmolaš ovttasbargoorgána oktasaš čovdosiidda. Lassin oassálastet iešráđđejeaddji guovllut Ålánda, Ruonáeanan ja Fearasullot ovttasbarggus.
  • Ovdagoddi molsojuvvo riikkaid gaskkas ovtta jagi ain hávális.
  • Riika geas ovdagodderolla lea jođiha politihkalaš vuoruhanbarggu ja davviriikkalaš stáhtaministtarčoahkkimiid.
  • Golbma váldogeainnu norgga ovdagoddeprográmmas: Davviriikat nuppástumis, Davviriikat Eurohpás ja Davviriikat máilmmis.
  • Dutkan lea deaŧalaš gaskaoapmi. NordForsk čielggada ja láhčá dili davviriikkalaš dutkanovttasbargui.
Bajás