Našuvnnalaš njuolggadusat 1. dássái leat mearriduvvon

Dát sisdoallu lea eanet go 5 jagis boaris.

Našuvnnalaš njuolggadusat 1. dássái mearriduvvojedje njukčamánu 15. beaivvi 2019:s. Dat čalmmustahttá deaŧalaš olahusa dearvvašvuođa- ja sosiálafágaoahpuid historjjálaš ovdánahttinbarggus.

Ođđa njuolggadusat dearvvašvuođa- ja sosiálaoahpuide

Njukčamánu 15. beaivi 2019:s šattai historjjálaš beaivin dearvvašvuođa- ja sosiálafágaoahpuide. Dalle mearriduvvojedje njuolggadusat vuosttaš gávcci ohppui.

- Dat čalmmustahttá deaŧalaš olahusa dearvvašvuođa- ja sosiálafágaoahpuid historjjálaš ovdánahttinbarggus, dadjá dutkan- ja alitoahppoministtar Iselin Nybø.

Duogáš lea Dieđ. St. 13 (2011–2012) Oahppu čálggu dihte – Ovttasdoaibma práksisis. Dieđáhusas čájehuvvui ahte dearvvašvuođa- ja čálgobálvalusat eai váikkut oahpuid fágalaš sisdollui doarvái bures. Das maid čájehuvvui ahte oahput leat beare stahtalaččat. Loahppaárvvoštallojuvvui ahte lea dárbu buoret stivremii ja buoret mekanismmaide našuvnnalaš dásis. Dasto álggahuvvui RETHOS-prošeakta. Prošeavtta bargu lea leamašan sihkkarastit ahte buot dearvvašvuođa- ja sosiálafága vuođđooahpuide ráhkaduvvojit láhkaásahusas nannejuvvon njuolggadusat. Dát lea stuorimus ovdánahttinbargu mii lea čađahuvvon dearvvašvuođa- ja sosiálafágaoahpuin, ja fátmmasta oppalaččat 20 vuođđooahpu.

- Lea stuora ja rámponveara bargu maid olu bealit leat čađahan. Leat dehálaš rievdadusat mat bohtet loktet oahpuid kvalitehta. Lean ilus go ođđa stivrenvuogádat dál implementerejuvvo áigumušaid mielde, dadjá Nybø.

 

Oktasaš gelbbolašvuohta profešuvdnaoahpuid rastá

Máhttodepartemeanta lea nammadan prográmmajoavkkuid juohke ohppui 1. dásis mat 2017 čavčča rájes leat ráhkadan evttohusaid njuolggadusaide. Prográmmajoavkkuin leat oahpuid, dearvvašvuođa- ja čálgobálvalusaid ja studeanttaid ovddasteaddjit.

Našuvnnalaš njuolggadusaid vuođđu lea láhkaásahus oktasaš rámmaplána dearvvašvuođa- ja sosiálafágaoahpuid ovddas. Ovdamearkka dihte galget buot studeanttat maŋŋel go leat oahpuid gárven, diehtit innovašuvdnaproseassaid ja systemáhtalaš buoridanbarggu birra, ja sis galgá leat digitála gelbbolašvuohta. Studeanttat galget maid šaddat gelbbolaččat ovttasbargat sihke fágaidrasttildeaddji, profešuvdnarasttildeaddji ja suorgerasttildeaddji vugiin. Oktasaš gelbbolašvuohta profešuvdnaoahpuid rastá galgá leat ávkin ja relevántan bargoeallimii.

Njuolggadusat galget leat njuovžilat ja vuorddehahttit

Našuvnnalaš njuolggadusat leat nannejuvvon láhkaásahusas ja stivrejit ásahusaid báikkálaš plánaid. Dat galget sihkkarastit našuvnnalaš čilgehusaid unnimus loahppagelbbolašvuođas juohke áidna oahpus ja seammás veahkehit ođasmahttit oahpuid, geavaheddjiid ja bálvalusaid dárbbuid mielde. Našuvnnalaš njuolggadusat galget leat njuovžilat ja čuovvut servodatovdáneami, muhto maiddái leat vuorddehahttit ásahusaide go barget oahpuiguin.

Ovttaskas ásahusat galget njuolggadusaid vuođul hábmet báikkálaš plánaid main leat mearrádusat fágalaš sisdoalu, organiserema, oahpahushámiid ja árvvoštallanhámiid birra ja čilgehus práksisoahpuid birra. Ásahusaid báikkálaš plánat galget soahpat oktii láhkaásahusain oktasaš rámmaplána birra dearvvašvuođa- ja sosiálafágaoahpuid ovddas ja láhkaásahusain dan spesifihkka oahpu birra.

Čuovvovaš láhkaásahusat leat mearriduvvon:

Ásahusat fertejit čuovvut láhkaásahusaid skuvlajagi 2020-2021 ovddas.

Láhkaásahusat almmuhuvvojit moatti beaivvi geahčen lovdata.no:ii ja sáddejuvvojit oahppoásahusaide. Bohtet maid fargga sáddejuvvot johtočálus oahppoásahusaide. Johtočálus almmuhuvvo maid prošeavtta neahttasiidduide: www.regjeringen.no/rethos.

RETHOS:a birra

Našuvnnalaš njuolggadusaid ovdánahttinbargu lea ovttasbargu gaskkal Bargo- ja sosiáladepartemeantta (BSD), Mánáid- ja dásseárvodepartemeantta (MDD), Dearvvašvuođa- ja fuolahusdepartemeantta (DFD) ja Máhttodepartemeantta (MD). Bargu lea organiserejuvvon sierra prošeaktan, RETHOS-prošeakta.