Norga bargagoahtá ON riikkaidgaskasaš álgoálbmotgielaid logijagiin
Preassadieđáhus | Almmustahtton: 13.05.2022 | Gielda- ja guovlodepartemeanta
ON váldočoahkkin lea mearridan, ahte 2022–2032 lea ON álgoálbmotgielaid logijahki. Sámediggi ja Gielda- ja guovlodepartemeanta leat dál bargagoahtán logijagiin sihke dáppe ja riikkaidgaskasaččat.
– Álgoálbmotgielat eai leat mávssolaččat dušše midjiide álgoálbmogiidda, muhto maiddái olles máilmmi servodahkii. Dat sisdollet historjjá, kultuvrra ja luonddu birra mávssolaš dieđuid, maid eat seađe massit. Dat leat mávssolaš oassi min árbbis, dadjá sámediggepresideanta Silje Karine Muotka.
UNESCO mielde máilmmis leat 6000 - 7000 giela. 96 proseantta gielain hállet dušše golbma proseantta hálliin. Ollu gielat jávket go eai geavahuvvo.
– Logijahki lea buorre vejolašvuohta juogadit vásáhusaid sámegielaid nannemis, go dat sáhttá leat ávkin eará álgoálbmotgielaide ja unnitlogugielaide. Giellalogijahki addá midjiide vejolašvuođa searválagaid seailluhit ja ovddidit máilmmi álgoálbmotgielaid, dadjá sámediggepresideanta.
Norga ovddastuvvo riikkaidgaskasaš stivrenjoavkkus
UNESCO vástida giellalogijagi čađaheames, ja lea ásahan bargojoavkku, mas leat stáhtaid, álgoálbmogiid ja ON álgoálbmotáššiid bistevaš foruma ovddasteaddjit. Sihke Sámediggi ja Gielda- ja guovlodepartemeanta servet aktiivvalaččat riikkaidgaskasaš bargui. Norga lea mielde logijagi stivrenjoavkkus.
– Norggas lea ollu, mainna searvat logijagibargui. Mii leat ovdamearkka dihte ovddidan álgoálbmotgielaide giellateknologiija. Mii sáhttit dihtoriin jorgalit teavsttaid davvisámegielas dárogillii. Mis leat divvunprográmmat, mat dárkkistit sámegielteavsttaid riektačállima. Mii sáhttit čállit sámi bustávaid mobiillaiguin. Mii sáhttit maid álkit gávdnat rievttes sámegielsáni elektrovnnalaš sátnelisttuin, dadjá gielda- ja guovloministtar Sigbjørn Gjelsvik.
Stáhtaráđđi deattasta, ahte buot logijagi doaimmat hábmejuvvojit ovttasráđiid Sámedikkiin.
Riikkaviidosaš ovttasbargoforum ásahuvvon
Sámediggi ja departemeanta leat ovttas ásahan riikkaviidosaš ovttasbargoforuma, mii buohtalastá logijagi doaimmaid Norggas. Forumis leat ovddastuvvon sámi nuoraidsearvi Noereh, Sámi allaskuvla, Nord universiteahtta ja Romssa universiteahtta – Norgga árktalaš universiteahtta, Máhttodepartemeanta ja Giellaráđđi.
– Sámediggi lea jo ásahan buori, riikkarájáid rasttildeaddji ovttasbarggu álgoálbmotgielaid logijagi oktavuođas. Mii gulahallat maid jeavddalaččat árktalaš sáttagotti eará lahtuiguin. Dál oažžut vel riikkaviidosaš ovttasbargoforuma dán bargui. Mus lea nana jáhkku dasa, ahte ovttasbargoforum nagoda loktet sámegielaid dili, dadjá Sámedikki ráđđelahttu, Mikkel Eskil Mikkelsen.
UNESCO lea ráhkadan neahttasiiddu logijagi várás.
Gielda- ja guovlodepartemeantta preassatelefovdna: 22 24 25 00
Sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no