Norga váldá badjelasas njunušgoddedoaimma Davviriikkaid ministtarráđis jagi 2022

Ođđajagemánu 1. b. 2022 rájes váldá Norga badjelasas njunušgoddedoaimma davviriikkaid ráđđehusovttasbarggus, Davviriikkaid ministtarráđis. Odne buvttii stáhtaministtar Støre ovdan Norgga vuoruhusaid davviriikkaid njunnošiid čoahkkimis Københámmanis.

– Davviriikkaid searvevuohta lea áidnalunddot. Mis leat oktasaš vuođđoárvvut ja mis lea nana luohttámuš guhtet guimmiidasamet. Norga háliida nannet davviriikkalaš ovttasbarggu. Dat boahtá čielgasit oidnosii min ráđđehusa vuođđovuogádagas mii aiddo báliid lea almmuhuvvon. Dakkár máilmmis maid lassáneaddji deaddu áitá, lea deháleabbo go goas ge suodjalit davviriikkalaš searvevuođa, dadjá stáhtaministtar Jonas Gahr Støre.

Davviriikkaid njunušgoddedoaibma bistá jagi, ja lea vuoruid mielde viđa davviriikkas. Dat riika mas lea njunušdoaibma, hábme bargoprográmma olles jagi ovttasbargui. Suomas lea dán jagi njunušdoaibma, ja Norga váldá formálalaččat njunušgoddedoaimma iežas vuoru mielde ođđajagemánu 1. b. 2022. Norgga jagi 2022 njunušgotti prográmma Davviriikkaid ministtarráđis čuovvu Visjon 2030 golmma strategalaš áŋgiruššansuorggi:

  • Ruoná Davviriikkat.
  • Gilvalannávccalaš Davviriikkat.
  • Sosiálalaččat guoddevaš Davviriikkat.

Geahča Norgga olles njunušgoddeprográmma dás.

– Mii áigut nu bures go nákcet váikkuhit dasa ahte Davviriikkat galget šaddat máilmmi guoddevaččamus ja buoremusat ovttasdoaibmi regiovdnan ovdal jagi 2030, cealká stáhtaministtar Støre.

Juohke davviriikkalaš ráđđehusas lea ovtta stáhtaráđis ovddasvástádus davviriikkalaš ovttasbarggus. Norgga ráđđehusas lea Anne Beathe Tvinnereim davviriikkalaš ovttasbargoministtar, dasa lassin ahte son lea ovddidanministtar ge. Son galgá Norgga bealis jođihit davviriikkalaš ministtarovttasbarggu ja njunušgotti.

Davviriikkat galget leat ovddasmanni regiovdna dan barggus mii čađahuvvo ollašuhttin dihtii ON guoddevašvuođa ulbmiliid ja ruoná nuppástuhttima Pariisa-soahpamuša vuođul. Ná sáhttá davviriikkalaš ovttasbargu váikkuhit dehálaš ovdánemiide ii dušše min iežamet regiovnnas, muhto muđui ge máilmmis, dadjá davviriikkalaš ovttasbargoministtar Tvinnereim.

Fákta

Davviriikkaid minsttarráđđi (DMR) lea davviriikkaid ráđđehusaid almmolaš ovttasbargoorgána. Davviriikkaid ministtarráđi lahtut leat davviriikkat Danmárku, Suopma, Islánda, Norga ja Ruoŧŧa. Dasa lassin leat Fársulluin, Ruonáeatnamis ja Ålánddas ovddasteaddjit. 

Davviriikkaid ráđđi lea almmolaš davviriikkalaš ovttasbarggu parlamentáralaš orgána ja das leat 87 parlamentarihkkára. Norgga, Suoma ja Ruoŧa sámedikkiin, ja vel Nuoraid davviriikkaid ráđis lea dárkonstáhtus.  

Davviriikkaid olgoriikapolitihkalaš ovttasbargu (N5) lea davviriikkaid olgoriikaministariid gaskasaš strategalaš gulahallan. Jagi 2022 váldá Norga badjelasas njunušgoddedoaimma N5:s ja dat mearkkaša ahte olgoriikaministtar jođiha čoahkkimiid.