Ođđa bagadeaddji boazodoalu ja plána- ja huksenlága birra

Eanandoallo- ja biebmodepartemeanta lea ráhkadan ođđa bagadeaddji boazodoalu ja plána- ja huksenlága birra. Bagadeaddji sáhttá leat ávkkálaš buot aktevrraide geat leat mielde plánenproseassain mat gusket boazodoalloguovlluide.

Boazodoalloealáhus dárbbaša areálaid, ja dat ahte beassat dárbbašlaš areálaide lea guovddáš eaktu dasa ahte ealáhus sáhttá olahit mihtu oažžut eanet buvttadeami ja gánnáhahttivuođa. Areálavuođu sihkkarastin lea okta dain stuorimus hástalusain maid boazodoallu dál vásiha.

Eanandoallo- ja biebmodepartemeanta lea dál ráhkadan bagadeaddji boazodoalu ja plána- ja huksenlága birra. Bagadeaddji galgá čalmmustahttit sihke dan movt boazodoalloberoštumit galget áimmahuššojuvvot plánenproseassain ja makkár geatnegasvuođat ja vuoigatvuođat boazodoalus leat. Dasa lassin galgá bagadeaddji veahkkin loktet gelbbolašvuođa boazodoalu birra ja ealáhusa dárbbu birra areálaide ja daid geavaheapmái. Bagadeaddji galgá leat reaidu buot aktevrraide geat leat mielde plánenproseassain mat gusket boazodoalloguovlluide.

– Bagadeaddji mii dál lea ráhkaduvvon boahtá veahkkin loktet gelbbolašvuođa plánenproseassaid čađaheami birra boazodoalloguovlluin ja boazodoalu birra. Mun sávan ahte bagadeaddji váldojuvvo atnui ja boahtá ávkin sihke plánejeddjiide ja doaibmaálggaheddjiide, muhto maid ahte bagadeaddji lea ávkin boazodollui go barget plánaáššiiguin iežaset guovlluin, dadjá eanandoallo- ja biebmoministtar Olaug V. Bollestad.

Ášši joatká gova vuolde.

Boazodoallu duoddaris.
Boazodoallu duoddaris. Govva: Boazodoallu duoddaris.

Boazodoalu areálaresurssaid áimmahuššan lei okta váldofáttáin dán jagi boazodoallošiehtadusain stáhta ja Norgga boazosápmelaččaid riikkasearvvi gaskkas.

Šiehtadusbealit bohte šiehtadallamiin ovttaoaivilii máŋga doaibmabiju birra mat galget addit buoret vuođu boazodoalloealáhusa bargui areálaáššiiguin. Lea ovttaoaivilvuohta das ahte álggahit pilohtaprošeavtta ráđđeaddinbálvalusa areálabargguid oktavuođas Norgga boazosápmelaččaid riikkasearvvis. Galget ráhkaduvvot bagadallanávdnasat maid ealáhus sáhttá atnit bargguin areálaáššiid birra, ja dat galget leat praktihkalaččat ja álkit atnit. Lea maid mearrideaddji ahte doaibmaálggaheddjiin ja eiseválddiin lea gelbbolašvuohta boazodoalu birra. Orohatplánat ja boazodoalu areálageavahankárttat leat guovddáš neavvut maiguin čalmmustahttit boazodoalu areálageavaheami.

– Areálat maid boazodoallu beassá atnit leat dehálaččat guoddevaš boazodollui ja lea eaktu loktet buvttadeami ja gánnáhahttivuođa ealáhusas. Doaibmabijut maid šiehtadusbealit dál leat soahpan, bohtet veahkkin nannet boazodolliid vejolašvuođa čuovvulit areálaplánaid ja huksendoaibmabijuid iežaset orohagain, loahpaha eanandoallo- ja biebmoministtar Olaug V. Bollestad.