ON riikkaidgaskasaš álgoálbmotbeaivi

− Odne mii čalmmustahttit riikkaidgaskasaš álgoálbmotbeaivvi, ja háliidan sávvat lihku Norgga álgoálbmogii, sápmelaččaide, ja buot eará álgoálbmogiidda, dadjá guovllu- ja digitaliserenministtar Linda Hofstad Helleland.

Dán jagi koronavirus vuhtto ON álgoálbmotjagi čalmmustahttimis. Pandemiija áitá duođalaččat ollu máilmmi álgoálbmogiid, ja ON lea danin válljen Covid 19 ja álgoálbmogiid vuostálastinnávccaid beaivvi fáddán. Beaivi čalmmustahttojuvvo interaktiiva paneladigaštallamiin, man fáddá lea mo álgoálbmogiid árbevirolaš máhttu sáhttá leat ávkin virusa vuostálastimis.

2019 lei ON riikkaidgaskasaš álgoálbmotgielaid jahki ja dalle čalmmustahtte máilmmi gielalaš máŋggabealatvuođa. Ráđđehus searvvai čalmmustahttimii, ja bargá viidáseappot dan ovdii, ahte sámegielat livčče ealli gielat, ja ahte daid galgá sáhttit geavahit buot servodatsurggiin.

− Ráđđehus oaidná mávssolažžan ovddidit digitála almmolaš suorggi olles Norgga álbmogii. Dan barggu olis lea dehálaš ahte maiddái sámegielat geavaheaddjit gávdnet digitála čovdosiid iežaset gillii. Mii leat danin ovttasbarggus Sámedikkiin válljen fáddán digitaliserema jagi stuorradiggedieđáhusas sámegiela, sámi kultuvrra ja servodateallima birra, dadjá Helleland.

Dieđáhus ovddiduvvo maŋŋeleappos dán mánu.

ON váldočoahkkin ásahii máilmmi álgoálbmotbeaivvi 1994, ja dat čalmmustahttá ON máilmmi álgoálbmogiid bargojoavkku vuosttaš čoahkkima 1982.