Ovdal ledje 33 stáhtalaš universitehta ja allaskuvlla ja dál lea lohku 21

Hedemárkku ja Lillehammer allaskuvllat ovttastahttojuvvojit ođđajagi rájes ja ožžot ođđa nama Høgskolen i Innlandet. (Siseatnama Allaskuvla). –Dáinna ovttastahttimiin leat ožžon sadjái stuorimus ođastusa maid 20 jagis leat olahan universitehta- ja allaskuvlasuorggis, cealká máhttoministtar Torbjørn Røe Isaksen.

Goappašat allaskuvlla stivrrat dohkkehedje čakčamánu 28.b. ovttastahttinmearrádusa, maid ráđđehus dál lea dohkkehan.

– Ovttastahttimiin šaddá álkit geavahit dálá skuvllaid buriid beliid. Ođđa allaskuvla beassá dál buorebut gilvalit riikka ja riikkaidgaskasaš dásis – sihke studeanttaid ja dutkanruđaid ektui, dadjá Røe Isaksen.

– Allaskuvla maid šaddá beaktileappot mii dahká vejolažžan doaibmat regionála aktevran ja bivnnut ovttasbargoguoibmin. Siseatnamis leage mihttomearri oažžut universitehtastáhtusa, ja dan mihttomeari doarjjun, dadjá son.

Lihkostuvvan ođastus

Ovttastahttin siseatnamis lea dán rádjai dat maŋimuš dáhpáhus maŋŋil go ráđđehus ovddidii stuoradiggedieđáhusa 18 Konsentrasjon for kvalitet, (Čohkket kvalitehta ovdii) njukčamánus 2015. Strukturođastusa áigumuš leai čohkket resurssaid unnit, muhto beaktileappot universitehtaide ja allaskuvllaide. Ollu ásahusat leat dál ovttastahttojuvvon miehtá riikka. 33 stáhtalaš ásahusa leat geahpeduvvon ja dál lea lohku 21. Dan lassin leat vel njeallje priváhta allaskuvlla ovttastahttojuvvon ja dál dat gohčoduvvo VID dieđalaš allaskuvlan.  

– Universitehtat ja allaskuvllat leat váldán ovddasvástádusa maid mii leat sidjiide addán ja čájehan dáhtu dahkat dárbbašlaš nuppástuhttimiid. Unnit, beaktilis ásahusaiguin sáhttit mii bajidit kvalitehta alitoahpus ja dutkamis. Dat lea mearrideaddjin dasa ahte Norga nagoda čađahit daid nuppástusaid mat gáibiduvvojit boahttevaš jagiid, cealká Røe Isaksen.

Studeantaovttastus

 Siseatnama Allaskuvla háliida oktasaš studeantačálggu organiseret ja dan dihte ferte Opplándda studeantaovttastus ja Hedemárkku studeantaovttastus ođđajagimánu 1.b.2017 rájes organiserejuvvot oktan ovttastussan. Ođđa studeantaovttastus gohčoduvvo Siseatnama Studeantaovttastus.

– Mii oaivvildat ahte oktasaš studeantaovttastus lea dat mii buoremus vuogi mielde  nákce fállat studeanttaide buriid čálgobálvalusaid, cealká Røe Isaksen.