Prošeakta, mainna ovddidit bohcco dearvvašvuođa
Ođas | Almmustahtton: 02.03.2022 | Eanadoallo- ja biebmodepartemeanta
Riikkaviidosaš prošeavttain nannejit gelbbolašvuođa bohccuid dearvvašvuođa ja buorredili birra.
Eanandoallo- ja biebmodepartemeanta ja Norgga Boazosápmelaččaid Riikkasearvi (NBR) šihtte álggahit prošeavtta «En nasjonal helsetjeneste for rein» (Bohcco nationála dearvvašvuođabálvalus) 2021/2022 boazodoallošiehtadusa olis.
– Ráđđehus sádde dainna čielga signála dan birra, ahte mii váldit duođas boazodoalu elliiddearvvašvuođa ja buorredili, dadjá eanandoallo- ja biebmoministtar Sandra Borch.
Boazodoalus leat ollu hástalusat ovddabealde, ee. dálkkádatrievdadusat, hástalusat muohttagiin, lohkkašuvvan guohtumat ja guohtumiid massimat. Dat sáhttá dagahit hástalusaid elliid dearvvašvuhtii.
– Viiddis ja vuogádahkan láhččojuvvon dearvvašvuođagoziheapmi ja gelbbolašvuođa ovddideapmi bohcco dearvvašvuođa ja buorredili birra leat danin hui mávssolaččat, dadjá Sandra Borch.
Riikkadásis eai leat dán ovdal čohkken vuogádahkan dearvvašvuođageahču, earret sarvaelliid CWD gozihanprográmma. Prošeakta, maid dál álggahit, ovddida ášši
Prošeakta lágiduvvo vuos golmma jagi pilohttaprošeaktan, maid Šibitdoavtterinstituhtta jođiha. Eanandoallodirektoráhtta doaibmá čállingoddin.
Ulbmilin lea earret eará nannet boazodoalu ja šibitdoaktáriid gelbbolašvuođa elliiddearvvašvuođa ja -buorredili birra. Pilohttaprošeavttain galgá ovddidit buoret máhttovuođu, ja láhčit vuođu vuogádahkii, man vehkiin guorahallet ja gozihit bohccuid dávddaid. Ulbmilin lea maid ovddidit máhtu boazodoalu ja badjesámi kultuvrra birra šibitdoaktáriid gaskkas.
Šibitdoavtterinstituhtas lea viiddis bargofápmudus. Dasa gullá ee. plánet ja čađahit kurssaid, mat heivehuvvojit badjeolbmuide ja šibitdoaktáriidda, máhtolašvuođa ovddideapmi ja fágalaš gaskkusteapmi ja bohcco dearvvašvuođadieđuid vuogádahkan čohkken. Dat fállet maid ráđđeaddima ja doarjaga boazodollui fáhkkatlaš diliin.